د. ئەمیر حسێن

(نان نیە با پسکیت بخۆن)، ئەم ڕستەیە بەدرێژایی مێژوو وەک سیمبولێک بۆ تێڕوانینی چینی دەسەڵاتدار و بێ ئاگاییان لە بارودۆخی ژیان و برسیەتیی خەڵک هێنراوەتەوە، کە زۆرجار دەخرێتە پاڵ ماری ئەنتوانێتی هاوسەری لویسی شانزەهەم، گوایە کاتێک شۆڕشگێڕە برسییەکان داوای نانیان کردووە، ئەو گوتویەتی: (ئاساییە، نان نییە با پسکیت بخۆن!). لەوکاتەوە ئەمە بووەتە پەندێک بەرامبەر هەر دەسەڵاتێک کە لە خەمی قەیران و مەینەتیەکانی کۆمەڵگاکەیدا نەبێت.
ئەوەتا دەسەڵاتدارانی ئێمەش، بەرامبەر ئەم هەموو قەیرانە وجودییەی وەک مەترسی هەڕەشە لە چارەنوسمان دەکەن، تەنها خەریکی سازدانی ڤیستیڤاڵی جۆراوجۆر و پێشانگای سەیروسەمەرەن. وەک ئەوەی بە هاوڵاتیان بڵێن: ئاساییە، کێشەتان هەیە، پێشانگاو ڤێستیڤاڵ بخۆن!
ئەمەش ڕەچێتەی چارەسەری حەکیمانەی دەسەڵاتە لە ئێستادا، بۆ بەشێک لەو قەیرانانەی بەرۆکی ئەم میللەتەیان گرتوە:
-         لەبەرامبەر قەیرانی سیاسی، ڤیستیڤاڵی باینجان و کولەکە، لەگەڵ دوو کەچک کۆنسێرتی دانولە.
-         لەبەرامبەر قەیرانی ئابوری، دوو ڤیستیڤاڵی هەنار، پێشبڕکێیەکی شاجوانی پشیلە و نمایشێکی جلوبەرگ.
-         لەبەرامبەر قەیرانی سوتەمەنی، دووشەوە ئاهەنگی پارکی ئازادی و ڤیستیڤاڵێکی مرادخانی.
-         لەبەرامبەر قەیرانی موچە، هەفتەیەک کۆنسێرت بۆ هونەرمەندانی تورک و عەرەب و فارس لەژێر ناوی (پێکەوەژیانی کولتورە جیاوازەکان!).
-         بۆ قەیرانی نرخی دۆلار، ڤیستیڤاڵێکی VIP لە حەوشەی پشتەوەی بازاڕی دۆلارەکە.
-         بەرامبەر قەیرانی کارەبا، ئاو، دزی و گەندەڵی، شەش مانگ بۆخۆتان هەڵپەڕن و ساڵی دووجار تازەی بکەنەوە.
-         بەرامبەر قەیرانی بێکاری و سەرهەڵگرتنی گەنجان، ڤیستیڤاڵی شەپقە، شۆڕتی سێچارەگی و نێرگەلە، لە پەنا جۆگە و ڕوبارەکان.
-         بەرامبەر قەیرانی نادادی و پێشێلکردنی ماف و ئازادی، دوو جورعە پێشانگا و سێ ڤیستیڤاڵی کۆتر و پەلەوەری خۆماڵی، لەگەڵ دیدارێکی پڕ لە میوە و خواردنە کوردەوارییەکان.
ئەرێ بەڕاست ئەمە ڕەچێتەی چارەسەری کێشەکانی وڵاتێکە، کە لە لایەک زیاتر لە دوو ساڵە هەڵبژاردنی ئەنجامداوە، بەڵام هێشتا پەڕلەمانەکەی کۆنەبۆتەوە و حکومەت پێکنەهاتووە؟ لە لایەکی ترەوە ئابوورییەکەی زیاتر لە (30) ملیار دۆلار قەرزدارە، لە هەمووشی گرنگتر گەلەکەی خەون بە دەوڵەتەوە دەبینێ، لە پێناویدا دەیان هەزار قوربانیی بەخشیوە و سەدەیەکە بێوچان تێدەکۆشێ و کارەساتی ئەنفال و کیمیایی تێپەڕاندوە. کەچی ئێستا هەموو هێزەکان بە ئۆپۆزسیۆنیشەوە دەستەو دوعا وەستاون بەڵکو (پارتی و یەکێتی) تەنها کۆببنەوە، لەولاشەوە ناوچەکە وەک مەنجەنیق دەکوڵێ و بۆتە جەنگی مەغڵوبە و هەر چوار دەورمان پڕە لە مەترسی و هەڕەشەی جۆراوجۆر؟!
لە کۆتاییدا، ڤیستیڤاڵ و پێشانگا و ئاهەنگ و بۆنەکان گرنگ و پێویستن، دەکرێت وەک نیشانەیەک بۆ سەقامگیری و خۆشگوزەرانی تەماشا بکرێن، بەڵام بە مەرجێک لەسەر بنەمای تەندروست و سروشتی خۆیان سەرپێ بخرێن. کاتێک ئامانج تەنها سڕکردنی کۆمەڵگا و داپۆشینی ئەم هەموو قەیرانە قورسە بێت، ئەوا بێگومان ڤیستیڤاڵ دەبێتە قەڵای درۆ و ڕەمزی هەڵخەڵەتاندن و تەنها دەرفەتێک بۆ لەبیر بردنەوە و خاڵیکردنەوەی توڕەیی و نیگەرانیەکان، لێرەوە ئیتر بە دڵنیاییەوە ڤیستیڤاڵ و پێشانگاو ئەم جۆرە چالاکیانە، پەیام و واتاو ئامانجە ڕاستەقینەکەی خۆیان لەدەست دەدەن.

ئەم وتارە دەربڕی بۆچونی نووسەر خۆیەتی