کاتێک سەرنجی دیمەنەکانی خۆپیشاندان و ئاڵۆزییەکانی فەرەنسا دەدەین، یەکێک لە سەرنجڕاکێشترین و جێی پرسیارترین دیاردەکان شکاندنی شووشەی دوکانەکان و تاڵانکردنی مۆڵە بازرگانییەکانە لەلایەن كەسانی دەمامکدارەوە. ئەم پرسیارەی کە ئایا ئەوانەی تاڵانی دەکەن کێن، بیانی و پەنابەرن یان فەرەنسیی ڕەسەن، لە ناو خودی میدیا و کۆمەڵگەی فەرەنساشدا مشتومڕێکی قووڵی دروست کردووە، بەڵام بۆ تێگەیشتن لە ڕاستییەکە دەبێت لە چەند ڕەهەندێکی کۆمەڵایەتی و سیاسییەوە سەیری بابەتەکە بکەین.
لە ڕووی یاسایی و فەرمییەوە، زۆربەی ئەو کەسانەی لە دۆسیەکانی تاڵانکردندا دەستگیر کراون، هەڵگری ڕەگەزنامەی فەرەنسین، بەڵام پێکهاتەکەیان فرەڕەهەندە.
بەشێکی بەرچاویان نەوەی دووەم و سێیەمی کۆچبەرانی باکووری ئەفریقا و ئەفریقای ڕەشن کە لە گەڕەکە هەژارنشینەکاندا گەورە بوون و هەست بە پەراوێزخران و بێکاری دەکەن. لە پاڵ ئەوانیشدا، گرووپی توندڕەوی وەک بلاک بلۆک هەن کە فەرەنسیی ڕەسەن و سپی‌پێستن و هێرشکردنە سەر بانک و براندە سەرمایەدارییەکان وەک جۆرێک لە جەنگ دژی دەسەڵات و سەرمایەداری دەبینن، هەر بۆیە دیاردەکە ناتوانرێت تەنیا بخرێتە پاڵ یەک نەتەوە یان پێکهاتەی دیاریکراو.
کاتێک بەراوردی دەکەین لەگەڵ وڵاتانی عەرەبی و ڕۆژهەڵاتی ناوەڕاست و هەرێمی کوردستان، دەبینین لە کاتی خۆپیشاندانەکاندا ئەگەر توندوتیژیش ڕوویدابێت، زیاتر ڕووبەڕووبوونەوە لەگەڵ هێزە ئەمنییەکان یان سووتاندنی بارەگای حزبی بووە، نەک تاڵانکردنی ئاشکرا و بەکۆمەڵی مۆڵ و دوکانەکان. ئەم جیاوازییە گەورەیە چەند هۆکارێکی کۆمەڵایەتی و دەروونیی لەپشتە کە شێوازی یاخیبوون لە ڕۆژئاوا و ڕۆژهەڵات لێک جیا دەکاتەوە.
لە کۆمەڵگە ڕۆژهەڵاتییەکاندا، بەربەستی کۆمەڵایەتی، خێزانی، هۆزایەتی و ئایینی هێشتا ڕێگرییەکی بەهێزە لەوەی تاکێک بە ئاشکرا دەست بۆ ماڵی هاووڵاتییەک یان دوکاندارێک بەرێت، چونکە ئەم کارە بە عەیبە و لەدەستدانی شەرەف و پێگەی کۆمەڵایەتی دادەنرێت. لە بەرامبەردا لە شارە گەورەکانی ئەوروپا، لاوازبوونی پەیوەندییە خێزانییەکان و گۆشەگیربوونی گەنجانی پەراوێزخراو وایکردووە ئەو سنوورە ئەخلاقی و نەریتییە زۆر کاڵ ببێتەوە.
هاوکات لە فەرەنسا، براندە گرانبەهاکان و سەنتەرە بازرگانییەکان لای ئەو گەنجانە نوێنەرایەتیی ئەو سیستەمە دەسەڵاتدار و سەرمایەدارییە دەکەن کە ئەوانی پەراوێز خستووە، بۆیە شکاندن و بردنی کەلوپەلەکان لای خۆیان تەنیا وەک دزیکردن نابینن، بەڵکو وەک تۆڵەسەندنەوە و دەستکەوتنی مافێکی زەوتکراو تەماشای دەکەن. جگە لەوەش، بەکارهێنانی دەمامک و هەماهەنگیی خێرا لە ڕێگەی تۆڕە کۆمەڵایەتییەکانەوە ڕووداوەکان دەگۆڕێت بۆ جۆرێک لە کێبڕکێ و ترێندی ناو سۆشیال میدیا.
لە ئەنجامدا، تاڵانکردنی مۆڵ و دوکانەکان لە فەرەنسا ناسنامەیەکی نەتەوەیی یان ئایینیی نییە، بەڵکو دەرئەنجامی بۆشاییەکی قووڵی پەروەردەیی و کۆمەڵایەتی و ئابوورییە.
لە هەر خۆپیشاندانێکدا کە دەرفەت دەڕەخسێت، تێکەڵەیەک لە گەنجی تووڕەی پەراوێزخراو و گرووپی ئایدیۆلۆژی و هەلپەرست کەڵک لە نەبوونی کۆنترۆڵی ئەمنی وەردەگرن بۆ دەستدرێژیکردنە سەر موڵکی گشتی و تایبەت، بێ ئەوەی گرنگ بێت ڕەچەڵەکی ڕاستەقینەیان چییە.
ئەم وتارە دەربڕی بۆچونی نووسەر خۆیەتی