شارپرێس

بەڕێوەبەرایەتی ئاسایشی خەلیفان دەستگیرکردنى شەش  تۆمەتباری ڕاگەیاند، کە لە ڕێگەى فرۆشتنى سیمکارتەوە وێنەى پێناسی هاوڵاتییانیان کۆپی کردووە و هەژمارى بانکیان بەناوەوە دروست کردوون و پارەیەکى زۆریان بە هەژمارەکان ئاڵوگۆڕ کردووە.

لە ڕاگەیاندراوێکدا، بەڕێوەبەرایەتی ئاسایشی خەلیفان بڵاویکردەوە، شەشە تۆمەتباریان دەستگیرکردووە، کە لە ڕێگەی بەخشینی سیمکارتی یەکێک لە کۆمپانیاکانى پەیوەندیکردن و پێدانی بڕی 20 هەزار دینار بە هەر کەسێکی وەرگری سیمکارتەکە، د=هەڵساون بە وێنەگرتنی کارتی نیشتیمانی و وێنەی کەسی هاوڵاتییان.

ئاماژە بەوەشکراوە ، لەو رێگەیەوە هەژماری بانکی نهێنییان دروستکردووە، بەو هۆیەوە پارەیەکی زۆریان خستۆتە سەر ئەم  هەژمارە بانکییانە و بەرەو دەرەوەی وڵاتیان بردووە، بە مەبەستی کڕینی دۆڵار بە نرخێکی کەمتر لە عێراق و دواتر هێنانەوە بۆ هەرێمی کوردستان بە ئامانجی فرۆشتنی بە نرخێکی زیاتر.

ئاسایشی خەلیفان ڕایگەیاندووە، تۆمەتبارەکان، پەڕاوی لێکۆڵینەوەیان بۆ کراوەتەوەو ڕەوانەی دادگا کراون و داوا لە هاوڵاتییان دەکات، هۆشیاربن بەرامبەر ئەم جۆرە فێلانە، چونکە لەوانەیە پێدانی کارتی نیشتیمانی و وێنەی خۆیان بۆ چەندین کاری مەترسیدارتر بەکاربهێنرێت و ئەگەری هەیە لە داهاتوودا زیانێکی زۆر لەو خاوەن هەژمارە بانکیانە بدات و باج و رسوماتی بانکی بکەوێتە سەر.