شارپرێس:

دەزگای ئاسایشی هەرێم ئاماری دوو رۆژی رابردوی هێرشەکانی سەر سنوری سلێمانی و کۆیەی بڵاوکردوەتەوە و دەڵێت، لەو دوو رۆژەدا 16 هێرشی درۆنی و موشەکی کراوەتە سەر ناوچەکە، دەشڵێت،" هێرشەکان هیچ زيانێکی گيانیان نەبوە و زۆربەیان لەئاسمان تێکشکێنراون ".

دەزگای ئاسایشی هەرێم لەڕاگەیەنراوێکدا ئاماژەی بەوەکرد،"رۆژی سێشەمە 17ى 3ى 2026 سێ هێرشی درۆنی و دوو هێرشی موشەکی کراوەتە سەر شاری سلێمانی - بارەگای هێزەکانی (70)، لەدەرئەنجامی هێرشەکاندا دوو پێشمەرگەی وەزارەتی پێشمەرگە بەسوکی برینداربون و هەروەها زۆربەی هێرشەکان لەئاسمان تێکشکێنراون ".

 ئەوەشیخستەڕوو،" دوو هێرشی درۆنی کاتژمێر 3:50 خولەک کراوەتە سەر شاروچکەی کۆیە -کەمپی پەنابەران، هەروەها دوو کارمەندی ئاگركوژێنەوەی خلیفان به سوكى برینداربون له كاتى جێبەجێکردنی ئەرک و فەرماندا ".

لەبارەی ئاماری ‌هێرشەکانی دوێنێ چوارشەمە، دەزگای ئاسایشی هەرێم دەڵێت،" دوو هێرشی درۆنی کراوەتە سەر شاری سلێمانی - بارەگاى هێزەکانی (٧٠) و یەک هێرشی درۆنی کاتژمێر دووی سەرلەبەیانی کراوەتە سەر سەنتەری شارۆچکەی کۆیە، دوای کاتژمێر 1:30 خولەکی دوا نیوەڕۆش تا ئێستا شەش هێرشی درۆنی کراوەتە سەر شارۆچکەی کۆیە -کەمپی پەنابەران ".