شارپرێس:
میدیا فەرمییەکانی ئێران بڵاویانکردەوە، کۆماری ئیسلامی هۆشداریی چۆڵکردنی بۆ چەندین دامەزراوەی نەوتیی لە سعودیە و ئیمارات و قەتەر دەرکردووە و ئاماژەیان بەوە کردووە کە لە کاتژمێرەکانی داهاتوودا هێرشی ئاسمانییان دەکرێتە سەر.

هۆشدارییەکە پاڵاوگەی سامرف و کۆمەڵگەی پترۆکیمیایی جوبەیل لە سعودیە، کێڵگەی گازی حوسن لە ئیمارات، کۆمەڵگەی پترۆکیمیایی مەسەعید و پاڵاوگەی ڕاس لافان لە قەتەر دەگرێتەوە.

لە هۆشدارییەکەدا هاتووە کە ئەم شوێنانە بوونەتە ئامانجی ڕاستەوخۆ و شەرعی، بۆیە داوا لە هاووڵاتیان و کارمەندان کراوە دەستبەجێ ناوچەکان چۆڵ بکەن. ئەم هەڕەشەیە دوای ماوەیەکی کەم لە هێرشکردنە سەر دامەزراوە نەوتییەکانی ئێران لە کێڵگەی پارسی باشوور و ناوچەی عەسەلوییە هات.

 ئاژانسی ئەکسیۆس لە زاری بەرپرسێکی باڵای ئیسرائیلەوە بڵاوی کردەوە کە ئەو هێرشانەی سەر ئێران بە هەماهەنگی لەگەڵ ویلایەتە یەکگرتووەکانی ئەمریکا ئەنجام دراون و دۆخەکەیان بەرەو گرژییەکی بێوێنە بردووە.

ئاکۆ عەبدوڵڵا ئاڵی