شارپرێس: یاسین نادر
لەكۆنگرەیەكی ڕۆژنامەوانیدا 48 كەرەنتینەكراوی نەخۆشخانەی هەورامان ڕەوانەی ماڵەوە كران و كەرەنتینەكەش داخرا.
ئازاد مستەفا، بەڕێوەبەری گشتی تەندروستی هەڵەبجە لەكۆنگرەیەكی رۆژنامەوانیدا وتی: ئێمە لەمشەوەوە كەرەنتینەی هەورامان تایبەت بەكەرەنتینەكراوان دادەخەین، ئەویش پاش ئەوەی لەلایەن تاقیگەی ناوەندی بەڕێوەبەرایەتی گشتی تەندروستی سلێمانییەوە ئەوەمان پێ ڕاگەیاندرا، سەرجەم پشكنینی 48 كەسی ناو كەرەنتینەكە نێگەتیڤ دەرچوون.
وتیشی: دەستخۆشی لە ستافی تەندروستی و هێزەكانی ناوخۆ و كەرەنتینەكراوان دەكەین، كە لەبەر هەندێك هەلومەرج هەندێك لەكەرەنتینەكراوەكانمان بەتایبەت بۆ ماوەی25 ڕۆژ بەناچاری هێشتەوە.
ئازاد مستەفا هەروەها وتی: ئێمە ئێستا ئامێری پشكنینمان لەسەر بودجەی پارێزگاكە بۆ پشكنینی نەخۆشانی كۆرۆنا بۆ پارێزگاكە كڕیوە و لە ئێستادا چوار تیمی لە بەرێوەبەرایەتی گشتی تەندروستی شارەكە ڕاهێنان لەشێوازی ئەنجامدانی پشكنینی كۆرۆنایان پێدەكرێت، تا گوشاری پشكنینەكان لە تاقیگەی ناوەندی سلێمانی كەمبكەینەوە و خۆمان چیدی ناوەندێكی پشكنینمان هەبێت.
لەبارەی چارەنووسی كەرەنتینەی هەورامانیشەوە ناوبراو ئاماژەی بەوەشدا، كەرەنتینەیە پاش رشاندنی دەرمان وەك نەخۆشخانەی تایبەت بە كۆرۆنا وەك پلانی B چیتر بەكاری دەهێنین و نەخۆشانی ڤایرۆسەكەی پێ تیمار و چارەسەر دەكەین.