شارپرێس:
جێگری سەرۆکی پەرلەمانی عێراق رایگەیاند، گەڕانەوەی شاندی هەرێمی کوردستان بۆ بەغدا ئەمجارە "بۆ ئیمزاکردنی" ئەو رێککەوتنەیە کە خەریکە لەگەڵ حکومەتی عێراق پێی دەگەن و رێککەوتنەکە تەنیا واژۆکردنی ماوە.
بەشیر حەداد، جێگری سەرۆکی پەرلەمانی عێراق ئاماژەی بەوەش کرد، بەغدا شتێک نادات بە هەرێمی کوردستان ئەگەر پابەند نەبێت بە هەندێک بەرپرسیارێتییەوە، حکومەتی هەرێمیش نکۆڵیی لەوە نەکردووە و کێشەی لەگەڵ ئەوەدا نییە ئیلتیزاماتە دەستوورییەکانی جێبەجێ بکات، ئەگەر بەغداش ئیلتیزاماتە دەستوورییەکانی بەتەواوی جێبەجێ بکات.
بە گوتەی جێگری سەرۆکی پەرلەمانی عێراق، ئەو رێککەوتنەی لەگەڵ مستەفا کازمی دەکرێت، رێککەوتنێکی کاتییە و تاوەکو کاتی هەڵبژاردنە، دوای هەڵبژاردن دەبێت رێککەوتنێکی دیکە لەگەڵ حکومەت بکرێتەوە.
بڕیارە هەفتەی داھاتوو شاندی هەرێمی کوردستان بچنەوە بەغدا، بەپێی زانیارییەکانی رووداو، ئێستا بۆ عێراق لە پرسی نەوت گرنگتر، داهاتی ناوخۆیی هەرێمی کوردستانە و لە بەرامبەر رادەستکردنی 50%ی ئەو داهاتە، بەغدا مانگانە لەنێوان 350 بۆ 400 ملیار دینار رەوانەی هەرێمی کوردستان دەکات، 60 ملیار دیناریش مانگانە وەکو شایستە داراییەکانی هێزی پێشمەرگە دەنێرێت.
