شارپرێس:
بەهۆی بەردەوامی شەپۆلی باران و بەفربارینەوە لەسەر رێگای سیدەكان- سۆران ئاستەنگی هاتووچۆ بۆ شوفێران و هاوڵاتیان دروستبووە و لەڕێگای سەری بەرد چەندین ئۆتۆمبێل گیریان خواردووە.
پەیامنێری شارپرێس لە ناوچەكە ئەوەی ئاشكراكرد، " كەمێك پێش ئێستا لەڕێگای سەری بەرد ژمارەیەك ئۆتۆمبێل ئاستەنگی هاتووچۆیان بۆ دروستبووە و داوای بەهانەوەچوون دەكەن، بەشێكیان لەلایەن كەسانی خۆبەخش یارمەتیان دراوە و تیمەكانی بەفر ڕاماڵینش بەردەوامن لە پاكردنەوەی ڕێگاكە بەڵام بەفر بارین بەردەوامە. "
خوسرەت سادق، بەڕێوەبەری چاككردن و پاراستنی ڕێگاوبانی سۆران، بە شارپرێس-ی راگەیاند، " لە شەش قەزای سنوری ئیدارەی سەربەخۆی سۆران تیمەكانی ڕاماڵینی بەفر ئامادەن بۆ پاككردنەوەی ڕێگاكان، بەڵام بەفربارین بەردەوامە، ئەمەش وایكردووە لەچەند شوێنێك ئاستەنگی هاتووچۆ دروستبێت بەتایبەتی ئەو ئۆتۆمبێلانەی دەبڵ نین و زنجیریان پێ نییە ."
ئاماژەی بەوەشدا: " لەدوێنێ شەو نزیكەی هەزار گەشتیار لەنێو بەفر گیریان خواردبوو و ڕزگاركران ."