ناوەندی راگەیاندن و چاپەمەنی هەپەگە رایگەیاند " لە رۆژی 16ی نیسانەوە سوپای توركیا هێرشی بۆ سەر گۆڕەپانی گوندەكانی ئاسێ، یەكماڵ، خرابێ، خانكێ و شێلازێی هەرێمی مەتینا دەستپێكردووەو هەنگاو بە هەنگاو بەرەوپێش دەچێت و دەیەوێت جموجۆڵی خۆی بەرفراوان بكات".
هەپەگە لە راگەیەندراوێكدا رونیكردەوە، "لەسەر ئەو بنەمایە شەوی ١٧، ١٨ و ١٩ی نیسان بە هەلیكۆپتەری هێرشبەر و فڕۆكەی شەڕكەر شاخی ئۆرتێ و شاخی چارچەلی بۆردومان كرد. هێرش لەشەوی ١٩ی نیسان لە گۆڕەپانی شێلازێ، بەرەو گۆڕەپانی دەرگەلێ بەرفراوان بووە و بەردەوامە".
ئاماژەی بەوەشكرد، لە دۆخی ئێستادا گۆڕەپانەكانی شاخی هەكاری، شاخی چارچەل، شاخی شەهید چەكدار، شاخی شەهید پڵنگ، شاخی ئۆرتێ، ئاسێ، یەكماڵ، خرابێ، خانكێ، شێلازێ و دەرگەلێ كراونەتە ئامانجی هێرشەكان و جمومجۆڵەكان لەو گۆڕەپانانە بەردەوامن.
هەپەگە ئاشكراشیكرد، لە هەمان كاتدا ئەو گۆڕەپانانە لە ئاسمانەوە بە هەلیكۆپتەر و فڕۆكەی شەڕكەر و لە زەمینیشەوە بە تۆپ و كاتیوشا بێ وەستان و بەردەوام بۆردومان دەكرێن.