شارپرێس:
بڕیاروایه له‌م هه‌فته‌یه‌دا هەردوو وه‌فدى دانوستانکاری پارتی‌و یەکێتیی، لەسەر پرسی پێکهێنانی کابینەی نوێی حکومەتی هەرێمی کوردستان کۆببنەوە.
بەمەبەستی پێكهێنانی کابینەی نوێی حکومەتی هەرێم، پارتی‌و یەکێتیی پێشتریش چەندجارێک کۆبونەوه‌یان ئه‌نجامداوه‌و تائێستاش لەسەر چەند خاڵێکی هاوبەش ڕێککەوتن، ئەوەی ماوەتەوە گفتوگۆکردنە لەسەر دابەشکردنی پۆستەکان.
چیا هەرکی یاریدەدەری مەکتەبی ڕێکخستنی پارتی لەهەولێر بەمیدیاى نزیك له‌حزبه‌كه‌ى وتوه، "ئەم هەفتەیە وه‌فدى دانوستانکاری پارتی سەردانی بۆ لای لایەنە سیاسییەکان دەستپێدەکاتەوە، لەو چوارچێوەیەشدا ڕۆژی دوشەممە سەردانی یەکێتیی نیشتمانی کوردستان دەکات".
هەرکی وتویه‌تى، "وه‌فدى پارتی پێكهاتوه لەهۆشیار زێباری، پشتیوان سادق، عەلی حوسێن پێکهاتوون، ئەگەر هەیە ئەندامی دیکەشى بۆ زیادبکرێت، لەگەڵ وه‌فدى یەکێتیی گفتوگۆ لەسەر پرسی دابەشکردنی پۆستەکانی کابینەی نوێی حکومەتی هەرێمی کوردستان دەکات".
ئاماژه‌ى به‌وه‌شكردوه، "ئەو کارنامەیەی پێشتر بۆ پێکهێنانی حکومەت هەردولا لەسەری ڕێککەوتبون وەکو خۆی دەمێنێتەوە، گفتوگۆی پارتی لەگەڵ لایەنەکان‌و لەگەڵ یەکێتیش هەم لەسەر پرسی پێکهێنانی حکومەتی هەرێم، هەم پێکهێنانی حکومەتی عێراق دەبێت".
