شارپرێس:
درید عەنزی، شارەزای ئابوریی عێراقی ڕایگەیاندووە کە بەرزبونەوەی نرخی دۆلار لە بازاڕەکانی عێراقدا چیتر تەنیا پەیوەست نییە بە ڕێکارەکانی بانکی ناوەندی و حکومەت، بەڵکو ئێستا دۆلار بە شێوەیەکی سەرەکیی لەژێر کاریگەریی گۆڕانکارییەکانی نرخی زێڕ و زیودایە لە ئاستی جیهاندا.

 
عەنزی ئاماژەی بەوە کردووە کە بەرزبوونەوەی بەرچاوی نرخی زێڕ و زیو وای کردووە دابەزینی نرخی دۆلار کارێکی لۆژیکی نەبێت، چونکە ئەم کانزایانە لە ئێستادا پێشەنگن لە کاریگەرییان لەسەر دراوە جیهانییەکان و بازاڕی ناوخۆش.

هەروەک دەڵێت:  زیادبوونی داواکاری بۆ دۆلار بەهۆی قاچاخچێتی و پاشەکەوتکردنەوە، لەگەڵ هەبوونی جیاوازییەکی زۆر لە نێوان نرخی فەرمی و نرخی بازاڕ، وای کردووە هاووڵاتییان و بازرگانان ڕوو لە کڕین و کۆکردنەوەی دۆلار بکەن و تەنانەت وەک ئامرازێکی دەڵاڵی و سوود وەرگرتن لە قەیرانە سیاسییەکانی ناوچەکە بەکاری بهێنن.

 ئەو شارەزایە جەختی کردۆتەوە کە بەبێ سەقامگیریی سیاسیی لە ناوچەکە و سەقامگیریی ئابووریی جیهانی، نرخی دۆلار دانابەزێت.

هەروەک ڕەخنەی توندی لە ئەدای حکومەت گرتووە لە مامەڵەکردن لەگەڵ ئەم دۆسێیەدا و پێی وایە نەبوونی دیدگایەکی ڕوون و بڕیارە ناجێگیرەکان بوونەتە هۆی قووڵتربوونەوەی ئەم قەیرانە لەبری چارەسەرکردنی.