شارپرێس:

موقتەدا سەدر جیابونەوەی تەواوەتی هێزەکانی سەرایا سەلامی لە رەوتی نیشتیمانی شیعەکان راگەیاند و وەک یەکەم گروپی چەکداری شیعی، بڕیاریدا ئەو هێزانە بخرێنە سەر دەوڵەت و بچنە ژێر دەسەڵاتی هێزە فەرمییەکانی وڵاتەکە.

موقتەدا سەدر، رابەری رەوتی نیشتیمانی شیعەکان لەپەیامێکدا ئاماژەی بەوەکرد،" لەسەر بنەمای بەرژەوەندییە گشتییەکان وڵات و دورخستنەوەی عێراق لەمەترسییەکان، بڕیارماندا هێزەکانی سەرایا سەلام بەتەواوەتی لە رەوتی نیشتیمانی شیعی جیاببێتەوەو و بچنە ژێر دەسەڵاتی حکومەت و بەرپرسی گشتی لە پێکهاتە سەربازییەکانی وڵات ".

ئەوەشیخستەڕوو، ئەو لایەنە مەدەنییانەی سەر بە سەرایا سەلامن بەبێ هیچ بارەگا و چەک و ناونیشانێک دەمێننەوە.

موقتەدا سەدر لەپەیامەکەیدا دەشڵێت،" هیواخوازم سەرجەم پێکهاتەکانی حەشدی شەعبی جیاببنەوە لە فەرمانە حزبی و تائیفییەکان و چەکەکانیان رادەستی وڵات بکەن".

ئەم هەڵوێستەی سەدر لەکاتێکدایە، لەماوەی چەند ساڵی رابردودا ئەمریکا بەردەوام داوای چەکدانانی هێزە چەکدارییەکانی سەر بە حەشدی شەعبی کردوەو و چەند جار لەسەر ئەو پرسە هەڕەشەشی لە حکومەتی عێراق کردوە.