شارپرێس:
بەرپرسی کاروباری دەرەوەی یەکێتیی
ئەوروپا رایگەیاند “یەکێتیی ئەوروپا پشتگیری لە هەڵوێستی عێراق
لەبارەی سزاکانی ئەمریکا بۆسەر ئێران دەکات".
ئەمڕۆ هەینی نووسینگەی سەرۆکوەزیرانی
عێراق راگەیێندراوێکی لەبارەی پەیوەندی تەلەفۆنی فێدریکا مۆگرینی و عادل عەبدولمەهدی
بڵاوکردەوە و رایگەیاند "مۆگرینی پەیوەندی بە عادل عەبدولمەهدییەوە کرد و
بەبۆنەی دەستبەکاربوونی وەک سەرۆکوەزیرانی نوێی عێراق، پیرۆزبایی لێکردووە".
نووسینگەی سەرۆکوەزیرانی عێراق ئاماژەی
بەوەشداوە ""مۆگرینی جەختی لە پشتگیری یەکێتیی ئەوروپا بۆ عادل
عەبدولمەهدی و حکومەتەکەی کردەوە، ئاماژەی بەوەشکرد کە کارکردن لەگەڵ عێراق
ئەولەوییەتێکی گرنگی یەکێتیی ئەوروپایە".
مۆگرینی ئەوەشی وتوە "یەکێتیی
ئەوروپا چاودێری هەنگاوەکانی عادل عەبدولمەهدی دەکات لە پێکهێنانی حکومەت و
هەوڵدان بۆ تێپەڕاندنی پشکپشکێنە لە هەڵبژاردنی وەزیرەکاندا".
بەگوێرەی راگەیێندراوەکەی نووسینگەی
سەرۆکوەزیرانی عێراق "مۆگرینی ئامادەیی یەکێتیی ئەوروپای بۆ هاوکاریکردنی عێراق لە
رووی سیاسی و دارایی و ئەمنییەوە دەربڕیوە، سەرەڕای پشتگیریکردن لە هەڵوێستی عێراق
بەرامبەر بە سزاکانی ئەمریکا بۆسەر ئێران".
هـ ـ ر