شارپرێس:
سەدان ملیۆن پارچەی پلاستیكی لە زەریای هێمندا بڵاوبوونەتەوە ، زاناكانیش ئەوە وەك ئاماژەیەكی نوێ بۆ تەشەنەسەندنی دیاردەی پیسبوونی ژینگەی جیهان هەژمار دەكەن .
بەتێكرایی زیاتر لە ٤٠٠ ملیۆن پارچە پلاستیك، كە كێشی هەموویان دەگاتە ٢٣٨ تۆن لە كەناراوەكانی كۆمەڵە دوورگەكانی كۆكۆس كەڵەكە بووە ، كە لە ٢٧ دورگەی بچووك پێكدێت و سەدان كەسیان لێنیشتەجێیە و ٢١٠٠ كیلۆمەتر لە رۆژئاوای ئوسترالیا دوورە .
زانای زیندەوەرزانی جینیفەر لاڤرز دەڵێت ئەو پاشماوە پلاستیكیانە تەنیا بەشێكی بچووكی دیاردەكەن .
ئەو تویژەرە لە زانكۆی تەسمانیا بە ئاژانسی فرانس پریسی گوتووە " ١٥ ساڵە خەریكی لیكۆڵینەوەم لەسەر ئەو كۆمەڵە دوورگە دابڕاوە ، هەموویان زیانی هاوشێوەیان پێگەیشتووە".
تیمی توێژینەوەكە دەڵێن: ئەو برە پلاستیكەی لە چینە جیاوازەكانی ناو لمی كەناراوی دەریا و زەریاكاندایە ٢٦ جار لەو برە زیاترە كە لەسەر ڕووی لمەكە هەیە ، بۆیە ئەو لێكۆڵینەوەیە ئەوەی دەرخست كە كێشەكە زۆر لەوە گەورەترە وەك پێشبینی دەكرا.
تائێستاش بەرهەمهێنانی جیهانی پلاستیك هەر زیاد دەكات ، نیوەی زیاتری پلاستیكی بەرهەمهێنراو بۆ ئەو ٣٠ ساڵەی دوایی دەگەڕێتەوە ، ئەوەش وادەكات ملیۆنان تۆن پلاستیك بخرێنە ناو دەریا و زەریاكان ، ئەوەش مەترسی لەسەر سامانی ئاژەڵی ناو دەریاكان درووست دەكات .
وەرگێران: ئاكۆ عەبدوڵڵا ئاڵی
