شارپرێس:
شاخەوان عەبدوڵڵا ئەندامی لیژنەی پارتی دیموكرات بۆ ئاسایكردنەوەی ناوچەكێشەلەسەرەكان، رەتیكردەوە، راكان سەعید جبوری بووبێت بەپارێزگاری كەركوك.
شاخەوان عەبدوڵڵا لەمیانی روونكردنەوەیەك دەڵێت: هەواڵێك لە پەیجی راكان سەعید بڵاوكراوەتەوە بەوەی كراوەتە پارێزگاری كەركوك بەفەرمی، لەدوای بڵاوكردنەوەی ئەو هەواڵە پەیوەندیمان كرد بەنووسینگەی سەرۆك وەزیرانی عێراق و ئەمیندارییەتی ئەنجوومەنی وەزیرانەوە ئەوەیان پشت راستكردەوە، كە ئەو هەواڵە هیچ بنەمایەكی نییەو دوورە لەراستییەوە.
شاخەوان عەبدوڵڵا دەشڵێت: دەمەوێت ئەوەش بڵێین، كە ئێمە لەرابردووش دانمان بە راكان سعید نەناوە وەك پارێزگاری بەوەكالەت و هەموو هەنگاوێكیش دەنێین بۆ ئەوەی باجی ئەو تاوانانە بداتەوە، كە لەدوای ١٦ ئۆكتۆبەر ئەنجامی داوە.
هەروەها دووپاتیكردووەتەوە، كە ئەو بڕیارە نایاساییانەی لەلایەن ناوبراو دراوە هەڵدەوەشێتەوە و هیچ بەهایەكی یاساییان نییە .
هـ ـ ح