شارپرێس

وەزیرى تەندروستى حکومەتى هەرێم ڕایدەگەیەنێت، کەرتی تەندروستی لە ھەرێمی کوردستان ھاوشێوەی وڵاتان بەردەوام لە پێشکەوتندایە لە ڕووی پسپۆڕی و ئامێر و ژێرخانەکان و پێشکەشکردنی خزمەتگوزارییەکان و دەشڵێت: شۆڕشێکمان لە بواری چاکسازیی دەرمان و پێداویستیی پزیشکیدا کردووە.

دکتۆر سامان بەرزنجی، وەزیرى تەندروستى حکومەتى هەرێم ڕایگەیاند، کەر تەندروستی لە ھەرێمی کوردستان ھاوشێوەی وڵاتان بەردەوام لە پێشکەوتندایە لە ڕووی پسپۆڕی و ئامێر و ژێرخانەکان و پێشکەشکردنی خزمەتگوزارییەکان، بۆ ئەوەی بتواندرێت چارەسەری  نەخۆشەکانی پێ بکرێت، چونکە پێشتر ھەندێک خزمەتگوزاری لە ھەرێمی کوردستان بوونیان نەبوو وەکو ھەندێک نەشتەرگەری و پشکنین و ھەندێک ئامێر و پسپۆڕی، بەڵام ئێستا لە زۆرینەی بوارەکان وەکو پسپۆڕییەکانی بواری پزیشکی و نەشتەرگەری، پێشوەچوونی باشی بەخۆیەوە بینیوە، کە لە ئێستادا لە عێراقیشەوە بۆ ئەو مەبەستە سەردانی ھەرێمی کوردستان دەکەن.

وەزیرى تەندروستى وتیشى: بۆ کوالیتی دەرمانیش ئێمە هەر زوو دەستمان پێکرد و سەرەڕای ھەموو ئاستەنگەکان، بۆ یەکەمجار چەندین چاکسازی لە بواری دەرمان و پێداویستیی پزیشکی کرا، بۆیە لە هەرێمی کوردستان شۆڕشێکمان لە بواری چاکسازیی دەرمان و پێداویستیی پزیشکیدا کردووە.

سامان بەرزنجى دەشڵێت: ھاوردەکردنی دەرمان ھەر وا بە ئاسانی نییە و ھەر دەرمانێک بێتە ھەرێمی کوردستان، بەپێی کۆمەڵێک رێنمایی، پشکنینی بۆ دەکرێت ئەو کات رەزامەندی لەسەر دەدرێت و ستیکەری لێدەدرێت و دەکەوێتە بازاڕەوە، بۆیە ھەر وا بە ئاسانی دەرمان ناتواندرێت ھاوردەی ھەرێم بکرێت، چونکە پێویستە سەرچاوەی دەرمانەکە دیار بێت و ئەگەر دیار نەبێت، ئێمە بە ھیچ شێوەیەک وەریناگرین.