شارپرێس:

تۆم باراک نێرده‌ى ئه‌مریكا بۆ سوریا ڕایگه‌یاند، گفتوگۆی به‌رده‌وام له‌نێوان مەزڵوم عەبدی‌و هاکان فیدان هه‌یه‌و سه‌رۆكی توركیاش پشتگیریی ئه‌و گفتوگۆیانه‌ ده‌كات.

به‌گوێره‌ى ئه‌و زانیاریانه‌ى نێردەی تایبەتی سه‌رۆكی ئەمریکا بۆ کاروباری سوریا ئاشكرایكردوه‌، گفتوگۆی به‌رده‌وام له‌نێوان فه‌رمانده‌ی گشتیی هێزه‌كانی سوریای دیموكرات‌و به‌رپرسانی باڵای توركیا هه‌یه‌و سه‌رۆكی توركیاش پشتگیریی ئه‌و گفتوگۆیانه‌ ده‌كات.

تۆم باراک له‌چاوێكه‌وتنێكی ڕۆژنامه‌وانیدا ئاماژه‌ى به‌وه‌داوه‌، "گفتوگۆی به‌رده‌وام له‌نێوان مه‌زڵوم عه‌بدی فه‌رمانده‌ی گشتیی (هه‌سه‌ده‌)و هاكان فیدان وه‌زیری ده‌ره‌وه‌ی توركیاو به‌رپرسانی دیكه‌ی باڵای ئه‌و وڵاته‌ هه‌یه‌".

ئه‌وه‌شى ڕونكردوه‌ته‌وه‌، "خودى ڕه‌جه‌ب ته‌یب ئه‌ردۆغان سه‌رۆكی توركیا له‌پێناو بونیادنانه‌وه‌ی متمانە لەسەرتاسەری سنورە مێژوییە ناجێگیرەكان، پشتگیریى ئه‌و گفتوگۆیانه‌ ده‌كات".

به‌وته‌ى باراک، تورکیا هاوپەیمانێکی نایابی ئه‌مریكاو ناتۆ بوە، زۆرجاریش بەهەڵە تێگەیشتون، بەڵام هەمیشە هاوبەشێکی گرنگی ناتۆ بوە".

جه‌ختیكردوه‌ته‌وه‌، "په‌یوه‌ندیی‌و تێوه‌گلانی توركیا له‌گه‌ڵ هێزه‌ كوردییه‌كانی سوریا سه‌ره‌ڕای ململانێ‌و ناكۆكی قووڵی نێوان، به‌ڵام ده‌رخه‌ری ئه‌و ڕاستییه‌یه‌ كه‌ هه‌موو ئه‌گه‌رێكی گفتوگۆ كراوه‌یه‌ بۆ ئه‌وه‌ی خوێنی زیاتر نه‌ڕژێت".

سه‌باره‌ت به‌سوریاش، باراك به‌پێویستى زانیوه‌، "سوریای نوێ پشت به‌چاكسازیی‌و تێكه‌ڵاوبون‌و هاوبه‌شیی ببه‌ستێت، گه‌لی سوریا به‌هه‌موو پێكهاته‌كانییه‌وه‌ له‌شه‌ڕی تائیفی تێریان خواردوه‌و پێویستیان به‌پێكه‌وه‌ژیان‌و ته‌بایی‌و ئاشتیی هه‌یه‌".

لاى خۆیشیه‌وه‌ ڕوانگەی سوریی بۆ مافەکانی مرۆڤ جه‌ختی له‌گفتوگۆى نێوان مەزڵوم عەبدی‌و هاکان فیدان كردوه‌ته‌وه‌و وتویه‌تى، "گفتوگۆكان له‌نێوانیاندا به‌رده‌وامه‌".