شارپرێس:
فه‌رمانده‌ى هه‌سه‌ده هۆشداریى له‌هێرشكردنه‌سه‌ر ڕۆژئاواى كوردستان ده‌دات‌و ڕایده‌گه‌یه‌نێت، "ئێمە بەهەموو جۆرێک دژی شەڕین، بەڵام ئەوەشی لەدەستمان بێت بۆ پاراستنی ئەزمونەکەمان دەیکەین"، ده‌شڵێت:"15 ساڵه له‌شۆڕشداین‌و ئێستاش هه‌ر له‌شۆڕشداین، پێشتر به‌شه‌ڕ، به‌ڵام ئێستا ده‌مانه‌وێت به‌دیالۆگ مافى گه‌ل بچه‌سپێنین، به‌ڵام پاشه‌كشه ناگه‌ین له‌هه‌ر ئه‌گه‌رێكى دیكه ئه‌گه‌ر پێویست بكات".
مه‌زڵوم عه‌بدى فه‌رمانده‌ى گشتیى هێزه‌كانى سوریاى دیموكرات (هه‌سه‌ده) له‌په‌یامێكدا ڕایگه‌یاند، "وه‌كو هه‌مولایه‌ك ده‌زانن ماوه‌ى 15 ساڵه ئێمه وه‌كو ڕۆژئاواى كوردستان له‌ناو شه‌ڕداین‌و سه‌ره‌نجامیش توانیمان هه‌نگاو بهاوین وڵاتى خۆمان‌و خاكه‌كه‌ى ئاوه‌دان بكه‌ینه‌وه، ئه‌وه‌ش به‌رهه‌مه‌كه‌ى زۆر خوێناوى بوو، چونكه شه‌هیدێكى زۆرمان بۆ ئه‌و شۆڕشه به‌خشیى".
عه‌بدى ده‌ڵێت:"بۆ پاراستنى ده‌ستكه‌وته‌كانى ڕۆژئاواى كوردستان، هه‌تا ئێستا ئێمه له‌شۆڕشدان، چونكه هه‌میشه مه‌ترسیى په‌لاماردان له‌سه‌ر ڕۆژئاواى كوردستان هه‌یه".
باس له‌وه‌شده‌كات، "ماوه‌ى چه‌ند مانگێكه پێكدادانى سه‌خت ڕوینه‌داوه‌و جۆرێك له‌ئارامیى ڕوى له‌ناوچه‌كه‌مان كردوه‌و له‌باكورو ڕۆژهه‌ڵاتى سوریا ئاگربه‌ستێكى هه‌مه‌لایه‌نه هه‌یه، به‌ڵام نایشارینه‌وه، مه‌ترسى دوباره بۆسه‌ر كوردو شه‌ڕڤانانى هه‌سه‌ده له‌ئارادایه، ئه‌وه‌ش به‌هۆى ئه‌وه‌ى هیچ هه‌نگاوێك له‌و ڕێكه‌وتنانه‌ى كردومانن، نه‌چوه‌ته پێش".
هۆشداریى به‌گه‌لى كورد له‌ڕۆژئاواى كوردستان ده‌دات‌و ئاگاداریان ده‌كاته‌وه كه ئاماده‌بن بۆ هه‌ر گۆڕانكاریه‌ك، بۆ ئه‌وه‌ش وتى، "جارێكى دیكه شه‌ڕ له‌سوریاو ڕۆژئاواى كوردستان سه‌رهه‌ڵنه‌داته‌وه‌و ئارامیى بۆ هه‌میشه باڵ بكێشێ، له‌گه‌ڵ ئه‌وه‌شدا جه‌ختده‌كه‌ینه‌وه، بەهەموو جۆرێک دژی شەڕین، بەڵام ئەوەشی لەدەستمان بێت بۆ پاراستنی ئەزمونەکەمان له‌باكورو ڕۆژهه‌ڵاتى سوریا دەیکەین‌و درێغى ناكه‌ین، له‌گه‌ڵ ئه‌وه‌ش له‌هه‌موو ئه‌و ناوچانه گه‌ل پێویسته ئاماده‌و چاوكراوه‌بن بۆ هه‌ر ئه‌گه‌رو گۆڕانكارییه‌ك".
سه‌باره‌ت به‌كۆبونه‌وه‌كه‌شى له‌ئادارى ئه‌مساڵ له‌گه‌ڵ شه‌رع، ئاشكرایكرد، "ئێمه له10ى ئادارى ئه‌مساڵ كۆبونه‌وه‌و دیدارى ڕاسته‌وخۆمان له‌گه‌ڵ ده‌سه‌ڵاتى فه‌رمانڕه‌واى دیمه‌شق هه‌بوو، ئومێده‌وارین ئه‌وه‌ى له‌سه‌رى ڕێكه‌وتین وه‌كو خۆى جێبه‌جێبكرێت، پێشمانوایه، له‌دواى ئه‌و هه‌موو ساڵه له‌نه‌هامه‌تى‌و شه‌ڕو ماڵوێرانى، ئیدى به‌سه‌و پێویسته خه‌ڵك هه‌ست به‌ئارامى‌و ئاسایش بكات له‌وڵاته‌كه‌یدا".
جه‌ختده‌كاته‌وه، "ئێمه له‌ڕۆژئاواى كوردستان چۆن پێشتر توانییمان به‌شه‌ڕ، ده‌ستكه‌وت‌و ئه‌زمونه‌كه‌مان بپارێزین، ئه‌مڕۆ ده‌مانه‌وێت هه‌مان ئه‌و پارێزگارییه‌و توندتریش بیپارێزین، به‌ڵام به‌دیالۆگ‌و ئاشتى‌و لێكتێگه‌یشتن".
ئه‌وه‌شى وت، "دواى كۆبونه‌وه‌كه‌ى 10ى ئادارى ئه‌مساڵ له‌دیمه‌شق له‌گه‌ڵ ده‌سه‌ڵاتى ئێستاى سوریا، گه‌یشتینه چه‌ند خاڵێكى باش به‌هه‌ماهه‌نگى هاوپه‌یمانان، به‌ڵام ئێستا هه‌نگاوه‌كانى ئه‌و نزیكبونه‌وه‌یه زۆر قورسن ده‌هاوێژرێن‌و كۆبونه‌وه‌كان زۆر به‌قورسى به‌ڕێوه‌ده‌چن، له‌هه‌ندێك ڕوه‌وه به‌ره‌و پێشچون هه‌یه، به‌ڵام پرسه بنه‌ڕه‌تیه‌كه كه مافه نه‌ته‌وه‌یی‌و داواكارییه‌كانه وه‌كو خۆیان ماونه‌ته‌وه".
