شارپرێس:

تایبەت بەدەرماڵەو ئەو ئیمتیازاتانەی لەهەمواری یاسای پەروەردەی عێراق جێگیرکراون، شاندێکی یەکێتیی مامۆستایانی کوردستان بەرەو بەغدا بەڕێکەوتن، سه‌رۆكى یه‌كێتیه‌كه‌ش ده‌ڵێت:"هەوڵدەدەین ئەو ئیمتیازاتانەی لەعێراق هەن، مامۆستایانی هەرێمی کوردستانیش بگرێتەوە".

ڕۆژی دووشەممەی ڕابردوو 25/8/2025، پەرلەمانی عێراق هەمواری یاسای یەكەمی ژمارە 22ی ساڵی 2011ی وەزارەتی پەروەردەی پەسەندكرد، ژمارەیەک ئیمتیازی لەخۆگرتوە، یەکێتیی مامۆستایانیش هەوڵدەدات ئەو ئیمتیازاتانە مامۆستایانی هەرێمیش بگرێتەوە.

ئەحمەد گەرمیانی سەرۆکی یەکێتیی مامۆستایانی کوردستان کە بەسەرۆکایەتیی شاندێک سەردانی بەغدای کردوە، وتى:"لەڕێگەی سەندیکای مامۆستایانی عێراق‌و نوێنەرانی کورد لەبەغداو دانوستانەکانی نێوان هەرێم‌و عێراق هەوڵدەدەین ئەو ئیمتیازاتانە مامۆستایانی هەرێمی کوردستانیش بگرێتەوە".

به‌گوێره‌ى هەمواری یاسای پەروەردەی عێراق دەرماڵەی پیشەیی مامۆستایان لە 150 هەزار دینارەوە بۆ 300 هەزار دینار زیادکرا.

هەموو مامۆستایەکیش کە دادەمەزرێت دەبێت سێ تا پێنج ساڵ لەناوچە دورەدەستەکان خزمەت بکات، ئەو ماوەیەش بۆ مەبەستی خانەنشینی بەدوو بەرامبەر هەژماردەکرێت.