شارپرێس:
فه‌رمانده‌ى گشتیى یه‌كینه‌كانى پاراستنى گه‌ل (یه‌په‌گه) په‌یامێك ئاراسته‌ى حكومه‌ته‌كه‌ى شه‌رع ده‌كات‌و ڕایده‌گه‌یه‌نێت، "دەتوانین لەسەر بنەمای ئەزمون‌و شارەزایی خۆمان، سوپای سوریا بونیادبنێینه‌وه‌و مەشق‌و ڕاهێنانیشیان پێبکەین"، ده‌شڵێت:"هیچ مەترسیەکمان بۆ سەر دەوڵەتی تورکیا دروستنەکردوه‌و دروستیشى ناكه‌ین".
سیپان حەمۆ فەرماندەی گشتیی یەکینەکانی پاراستنی گەل (یه‌په‌گه) جه‌ختده‌كاته‌وه له‌سه‌رئه‌وه‌ى، ئه‌وان وه‌كو یه‌په‌گه باوەڕیان بەیەکڕەنگى نییه له‌سوریا، بەڵکو باوەڕیان بەبەشداریی‌و پرۆسه‌یه‌كى دیموکراسیی هەیە.
حه‌مۆ هۆشداریده‌دات‌و ڕایده‌گه‌یه‌نێت، "بەبێ چارەسەری دیموکراسیی، سوریا دەبێتە گۆڕەپانی ململانێ‌و دوبەرەکی هەمیشەیی".
سه‌باره‌ت به‌و تۆمه‌تانه‌ى ده‌درێنه پاڵ گه‌لى كورد له‌ڕۆژئاواى كوردستان‌و سوریا به‌گشتیى، سیپان حه‌مۆ وتى:"ئەوان ئێمە بەجوداخواز تۆمەتباردەکەن، جوداخوازى ئێمه‌ش تەنها ئه‌وه‌یه خەباتدەکەین بۆ سوریایەکی دیموکراسی یەکگرتوو، بەڵام له‌بنه‌ڕه‌تدا ئه‌وه سیاسەتەکانی حکومەته کە دەبێتە هۆی دابەشبونی وڵات".
باس له‌وه‌شده‌كات، "ئەگەر بارودۆخی سوریا نەگۆڕێت‌و ئاشتی زاڵنه‌بێت، ناتوانین باس لەگۆڕان‌و یەکگرتن بکەین، دواتر په‌یاممان بۆ حكومه‌ته‌كه‌ى شه‌رع ئه‌وه‌یه، ئێمه وه‌ك هه‌سه‌ده‌و یه‌په‌گه دەتوانین لەسەر بنەمای ئەزمون‌و شارەزایی خۆمان، سوپای سوریا بونیادبنێین‌و مەشق‌و ڕاهێنانیان پێبکەین، نەک پشت بەهاوکاریی دەرەکی ببەستین".
سه‌باره‌ت به‌وه‌ش ئاخۆ ڕۆژئاواى كوردستان‌و هه‌سه‌ده یان یه‌په‌گه چ مه‌ترسیه‌كیان بۆسه‌ر توركیا هه‌یه، سیپان حه‌مۆ وتى:"هیچ مەترسیەکمان بۆ سەر دەوڵەتی تورکیا دروستنەکردوه‌و دروستیشى ناكه‌ین".
ئه‌وه‌شى وت:"حکومەتی سوریا هەر لەسەرەتای واژۆکردنی ڕێککەوتنه‌كه‌ى 10ی ئاداره‌وه له‌گه‌ڵ مه‌زڵوم عه‌بدى، ئه‌و ڕێكه‌وتنه‌ى پێشێلکرد لەڕێگەی ئەو کۆمەڵکوژییانەی کە لەکەناراوەکان‌و سویدە ئەنجامدراون، ئەگەر دیمەشق بەڕاستی توانای ئەوەی هەبێت هەموو سورییەکان لەباوەش بگرێت، هێزەکانمان هێزێکی پارێزەر دەبن بۆى".
ئه‌وه‌شى نه‌شارده‌وه، "ئەوەی دروزەکان لەسوه‌یدا توشی بون، کاری هۆزەکان نەبوو، بەڵکو دەرئەنجامی یارییەکی هەواڵگریی وڵاتان بوو بەئەنقەست له‌وێ ئه‌نجامدرا".
