شارپرێس:
سه‌رباریى ئه‌وه‌ى به‌یانى زوو میدیاى نزیك له‌پارتى ئاشكرایكرد، به‌غدا بڕى 690 ملیار دینارى خستوه‌ته‌سه‌ر هه‌ژمارى وه‌زاره‌تى دارایی هه‌رێم‌و دواتریش به‌شى دوه‌مى پاره‌كه كه 300 ملیاره خه‌رجده‌كرێت، سه‌رچاوه‌یه‌كى وه‌زاره‌تى دارایی هه‌رێم ڕه‌تیده‌كاته‌وه‌و بۆ یه‌كه‌مجار زانیاریى گرنگ ئاشكراده‌كات.
به‌یانى ئه‌مڕۆ زۆربه‌ى میدیاكانى نزیك له‌پارتى ئاماژه‌یان به‌وه‌دا، وەزارەتی دارایی عێراق بڕی 690 ملیار دیناری خستوه‌ته‌سەر هەژماری وەزارەتی دارایی هەرێم بۆ موچەی مانگی شەشی فەرمانبەران‌و کەمێکی دیكه‌ش بڕی 300 ملیار دیناری دیکە وەک بڕی دوەم‌و ته‌واوكاریى ڕه‌وانه ده‌كرێت.
پێچه‌وانه‌ى ئه‌و زانیاریانه، سه‌رچاوه‌یه‌كى وه‌زاره‌تى دارایى هه‌رێم ئاماژه‌ى به‌وه‌داوه، "ئه‌و زانیاریانه ڕاست نیین‌و تا ئەم ساتە یەک دینار نەخراوەتەسەر هەژماری دارایی هه‌رێم".
به‌وته‌ى سه‌رچاوه‌كه‌ى وه‌زاره‌تى دارایی، تاوەکو ئەم ساتە لەلایەن وەزارەتی دارایی عێراقەوە لقی هەولێری بانکی ناوەندی ئاگادارنەکراوەتەوە تاوەکو موچەی مانگی شه‌ش بخەنەسەر هەژماری دارایی هەرێمی کوردستان.
زانیاریى گرنگى ئاشكراكردو هۆكاره‌كه‌ى بۆ ئه‌وه گێڕایه‌وه، "هەرێمی کورستان 120 ملیار دینارەکەی بردبوە لقی هەولێری بانکی ناوەندیی، بەڵام تاوەکو کەمێک پێش ئێستا ئینجا ئیشعاری پێداون کە بخرێتەسەر هەژماری دارایی عێراق".
ده‌شڵێت:"بۆیە وەزارەتی دارایی عێراقیش ئێستا دەستیکردوە بەڕێکارەکانی تەمویلکردن، هەوڵی زۆریش هەیە ئەمڕۆ تەواوبکرێت‌و ئەگەریش هەیە ناردنی ئیشعار بمێنێتەوە بۆ سبەینێ دوشه‌ممه".
