شارپرێس:
دره‌نگانى شه‌وى ڕابردوو ده‌نگۆى هێرشێكى ئاسمانیی کراوەتەسەر چەند پێگەیەك له‌به‌غداو دوو لەئەفسەرانی سوپای پاسدارانی ئێران لەهێرشەکەدا کوژراون، سوپاى پاسداران به‌فه‌رمیى هاته‌ده‌نگ‌و ڕونكردنه‌وه ده‌دات.
دوای ئەوەی شەوی ڕابردوو دەنگۆی ئەوە بڵاوبوه‌وه لەبەغدا هێرشی ئاسمانیی کراوەتەسەر چەند پێگەیەک‌و دوو لەئەفسەرانی سوپای پاسدارانی ئێران لەهێرشەکەدا کوژراون، سوپای پاسدارانیش لەڕاگەیەندراوێکدا ئەو هەواڵە ڕەتدەکاتەوە.
ئاژانسی هەواڵی تەسنیمی ئێران لەزاری بەرپرسێکی سوپای پاسداران جه‌ختیكرده‌وه، بەمدواییانە هیچ ڕوداوێکی وا لەبەغدا ڕوینەداوە.
لەتۆڕە کۆمەڵایەتییەکاندا هەواڵی کوژرانی دوو فەرماندەی سوپای پاسدارانی ئێران بڵاوکرایەوە، لەهەمانکاتدا کەناڵی 12ـی ئیسرائیلی بانگەشەی ئەوەیکردبوو کە هێرشەکە لەلایەن فڕۆکەکانی ئیسرائیلەوە ئەنجامدراوەو میدیاکانی عێراقیش باسیان لەوەکرد، هێرشەکە لەلایەن ئەمریکاوە کراوە.
هەر لەبارەی دەنگۆکانی بەئامانجگرتنی چەند فەرماندەیەکی سوپای پاسدارانی ئێران لەبەغدا لەلایەن ئەمریکاو ئیسرائیلەوە، وەزارەتی ناوخۆی عێراق ڕایگەیاند، "هیچ هێرشیك نەکراوەتەسەر فڕۆکەخانەی بەغدا، ئەو دەنگۆیانەی لەسۆشیال میدیا بڵاوکراونەتەوە، دورن لەڕاستیه‌وه".
وەزارەتی ناوخۆی عێراق ڕایگەیاند، "دۆخی بەغدا ئارامەو هیچ ڕوداوێکی لەو شێوەیە ڕوینەداوە کە لەسۆشیال میدیا بڵاوکراونەتەوە".
دەشڵێت، "بڵاوکردنەوەی هەواڵی لەوشێوەیە، ئامانج لێی ترس خستنە دڵی هاوڵاتییانە".
وەزارەتی ناوخۆی عێراق داوایکرد، هەمولایەک پشت بەو زانیارییانە ببەستن کە لەسەرچاوەی فەرمیی بڵاودەکرێنەوە، بۆ دەستکەوتنی زانیاریی پشت بەپڕوپاگەندە نەبەستن.
