شارپرێس:
سه‌رباریى ئاگربه‌ست‌و پرۆسه‌ى ئاشتیى له‌نێوان توركیاو په‌كه‌كه، به‌ڵام سوپاى توركیا له‌م مانگه‌دا هێرشى چڕو قورسى بۆسه‌ر گه‌ریلاكانى په‌كه‌كه ده‌ستپێكردوه، ئامارێكى باڵى سه‌ربازیى په‌كه‌كه‌ش ده‌ڵێت:"ته‌نها له‌م مانگه‌دا سه‌رباریى ئاگربه‌ست، زیاتر لە14 هێرش بۆسەرمان ئه‌نجامدراوه".
ناوەندی ڕاگەیاندن‌و چاپەمەنیی هێزەکانی پاراستنی گەل (هەپەگە ـ باڵى سه‌ربازیى په‌كه‌كه)، لەبارەی هێرشەکانی سوپای توركیا کە لەنێوان (8 تا 31)ى ئه‌م مانگه بۆ سەر هێزەکانی گەریلا لەهەرێمەکانی پاراستنی مەدیا ئەنجامدراوە، ده‌ڵێت:"له‌و ماوه‌یه‌دا هێرشێكى چڕ كراوه‌ته‌سه‌ر گۆڕەپانی بەرخۆدانی سەری مەتیناو چوارجار بەچەکی قورس بۆردومانکراوە".
هه‌په‌گه ڕایگه‌یاندوه، "لە9ى ئه‌م مانگه‌دا سوپای توركیا هەوڵیاندا لەشوێنێکی نوێ لەگۆڕەپانی بەرخۆدانی سەری مەتینا لەهەرێمی مەتینا خۆیان جێگیربکەن، بەچەکی قورس تونێلەکانیان بۆردومانکردو گەریلاکان بەشێوازی تەکنیکی وەڵامی داگیرکەرانیان دایەوە".
هەر بەگوێرەی ڕاگەیەندراوەكە، "لە 11ى ئه‌م مانگه‌دا گۆڕەپانی دەشتی کافیە لەهەرێمی گارە، پێنج جار بەچەکی قورس بۆردومانکراوە، هاوكات له18و 19ى ئه‌م مانگه‌شدا گۆڕەپانی بەرخۆدانی شاخی بەهار لەڕۆژئاوای زاپی هەرێمی شەهید دەلیل سێجار بەچەکی قورس بۆردومانکراوە".
باس لەوەشکراوە، "لەنێوان 8 تا 31ى ئه‌م مانگه‌شدا، فڕۆکە بێفڕۆکەوانەکانی ئیهاو سیها، بەچڕی بەسەر ئاسمانی هەرێمەکانی زاپ، مەتینا، خواکوڕک، گارەو قەندیلدا سوڕاونەتەوەو سیخوڕیان کردوە".
