شارپرێس:
وه‌زاره‌تى دارایى‌و ئابورى هه‌رێم ڕایده‌گه‌یه‌نێت، لەسەر داوای ئه‌وان، دەستگیراوه بەسەر ژمارەیەک موڵکی کۆمپانیای نالیاو چاڤی، جه‌ختیشده‌كاته‌وه، "لەزیادکردنێکی ئاشکرادا سەرجەم ئەو موڵکانەی کۆمپانیای نالیاو چاڤی دەفرۆشرێت کە دەستیانبەسەرداگیراوەو ژمارەیان 60 موڵکە".
له‌ڕاگه‌یه‌نراوێكى فه‌رمى وه‌زاره‌تى داراییدا هاتوه، "قەرزەکانی وەزارەتی دارایی‌و ئابوری لەسەر کۆمپانیای نالیا، گەیشتوەتە نزیکەی 92 ملیار دینار".
ئه‌وه‌ش ئاشكراكراوه، "پاڵپشت بەبڕیاری سەرۆکایەتی دادگای پێداچونەوەی هەرێمی کوردستان‌و دەستەی شارستانی تێهەڵچونەوە ژمارە (90/ دەستەی شارستانی تێهەڵچونەوە/2021 ڕاستکردنەوە) لە20ى 10ى 2021 تایبەت بەیەکلاییکردنەوەی دۆسیەی قەرزەکانی کۆمپانیای نالیا لەبەرژەوەندیی وەزارەتی دارایی‌و ئاماژە بەبڕیاری بەڕێوەبەرایەتی جێبەجێکردنی دوەمی سلێمانی ژمارە (684/2024) لە22ى 9ى 2024 تایبەت بەدانانی نیشانەی گلدانەوە (حجز) لەسەر سەرجەم موڵکەکانی کۆمپانیای نالیاو کۆمپانیای چاڤی".
ئه‌وه‌ش باسكراوه، "ئاماژە بەبڕیاری داگای تێهەڵچونەوەی ناوچەی سلێمانی ژمارە (732/ پ/2024) لە26ى 11ى 2024 تایبەت بەڕاستاندنی بڕیاری ئاماژە بۆکراوی جێبەجێکاری داد لەسلێمانی، لەبەرژەوەندیی وەزارەتی دارایی‌و ڕەتکردنەوەی تانەی پێداچونەوەی کۆمپانیای نالیا".
وەزارەتی دارایی جه‌ختیكردوه‌ته‌وه، "لەڕێگه‌ی بەڕێوەبەرایەتی ناوبراو هەڵدەستێت بەفرۆشتنی موڵکە دەستبەسەرداگیراوەکانی کۆمپانیای نالیاو چاڤی کە ژمارەیان 60 موڵکەو پێکهاتوە لەچەندین پارچە زەویی‌و هۆتێل‌و کافتریاو کابینەی گەشتیاریی، پێشتر دەستی بەسەرداگیراوە بەمەبەستی وەرگرتنەوەی سەرجەم قەرزو سودە کەڵەکەبوەکانی کە لەئێستادا گەیشتوەتە بڕی (91.760.66.350) ملیار دینار".
وەزارەتی دارایی ئه‌وه‌شى وتوه، "لەدوای دەستبەکاربونی کابینەی نۆیەم لەسەر ڕاسپاردەی وەزیر، بەشێوەی چڕوپڕ کاری لەسەر ئەو دۆسیەیە کردوە، دواجار لەساڵی 2021 دوای بردنەوەی دۆسیەیەکی یاسایی لەکۆمپانیای نالیا لەلایەن وەزارەتی دارایی‌و ئەنجامدانی سەرجەم ڕێکارەکان، لەلایەن لیژنەیەکەوە چوار پارچە زەوی دانرابوو بەشێوەی زیادکردنی ئاشکرا بفرۆشرێت، بەڵام دواتر دەرکەوت ئەو پارچە زەویانە لەبنەڕەتدا بۆ سەوزایی‌و خزمەتگوزاریی تەرخانکراوەو ناتوانرێت ڕەگەزەکانیان بگۆڕدرێت‌و بخرێنە زیادکردنی ئاشکراوە".
هه‌ر له‌و ڕاگه‌یه‌نراوه‌ى داراییدا هاتوه، "خەمڵاندنێکی نادروست بۆ نرخەکانیان کرابوو، ڕێگریی یاسایی هەبوو بۆ فرۆشتنیان، بۆیە بەبڕیاری وەزیری دارایی، سەرجەم پرۆسەکە ڕاگیراوه‌و جارێکی دیكه لەلایەن تیمێکی پسپۆڕەوە کار لەسەر دۆسیەکە کرایەوەو سەرجەم ئەو موڵکانەی کە شایستەی فرۆشتنن نیشانەی گلدانەوەیان خرایەسەر".
له‌كۆتایی ڕاگه‌یه‌نراوه‌كه‌ى وه‌زاره‌تى داراییدا ئه‌وه‌ش ڕونكراوه‌ته‌وه، "دواجار لەسەر داوای (بانکی سلێمانی یەک) سەر بەبەڕێوەبەرایەتی گشتیی بانکە بازرگانییەکانی وەزارەتمان‌و دوای چەندینجار ئاگادارکردنەوەی کۆمپانیای نالیا بۆ گەڕاندنەوەی قەرزەکان‌و پابەندنەبونی لایەنی پەیوەندیدار، وەزارەتمان بەمافی یاسایی خۆی دەزانێت لەڕێگه‌ی زیادکردنی ئاشکراوە سەرجەم ئەو موڵکانە بفرۆشێت کە نیشانەی گلدانەوەیان خراوەتەسەرو داواکارین هەرکەس‌و لایەنێک ئارەزومەندە بەشداریی لەو زیادکردنەدا بکات دوای بڵاوبونەوەی ئاگاداریەکە لەڕۆژنامەی فەرمی دەتوانێت ڕێکارە یاسایی‌و کارگێڕیەکان جێبەجێبکات‌و بەشداریی لەپرۆسەکەدا بکات".
