شارپرێس:
بنیامین ناتانیاهۆ سەرۆک وەزیرانی ئیسرائیل ڕایگەیاند، فەرمانی بەبەکارهێنانی هێزی سەربازی لەسوریا داوە، جەختیشیکردەوە، "زۆرباش دەزانم مامەڵە لەگەڵ کێ دەکه‌م"، وەک ئاماژەیەک بەحکومەتی نوێی سوریا کە دوای ڕوخانی ڕژێمی بەشار ئەسەد، دەسەڵاتی گرتوه‌تە دەست.
لەمیانی سەردانەکەیدا بۆ ژوری ئۆپەراسیۆنەکان کە لەلایەن دروزەکانی ئیسرائیلەوە بۆ پشتیوانیی لەهاونیشتمانیان لەسوریا دایانمەزراندوە، نەتانیاهۆ وتى:"دۆناڵد ترەمپی سەرۆکی ئەمریکام ئاگادارکردوه‌تەوە کە ئاشتی تەنها لەڕێگەی هێزەوە بەدەستدێت".
ئاماژەی بەوەشکرد، "سەرەتا هێز دێت، دواتر ئاشتی دێت، ئەمەش واقیعی ناوچەکەمانە".
ناتانیاهۆ هەروەک وتویەتی، "کردەوەکانی ئیسرائیل لەسوریا لەسەر سێ ئامانجی سەرەکییە، ئەوانیش پاراستنی پێکهاتەی دروز لەسوەیداو ناوچەکانی دیکە، دڵنیابون لەدامەزراندنی ناوچەیەکی داماڵراو لەچەک لەباشوری دیمەشق، هەروەک کردنەوەی ڕێڕەوێکی مرۆیی بۆ گەیاندنی یارمەتیی بەدروزەکان لەباشوری ئەو وڵاتە".