شارپرێس:
محەمەد حەنون، وتەبێژی وەزارەتی بازرگانی عێراق ڕایگەیاند، بەم نزیکانە ڕێکارەکانی سڕینەوە و زیادکردنی ناو  لەسەر فۆڕمی ئەلیکترۆنی بەشەخۆراک دەستپێدەکات.

حەنون ئاماژەی بەوەشکرد، 85%ی دانیشتووانی هەرێمی کوردستان تۆمارکردن و نوێکردنەوەی فۆڕمی ئەلیکترۆنی بەشەخۆراکیان تەواوکردووە.

محەمەد حەنون دەڵێت "پرۆسەکە بە دوو قۆناغ جێبەجێ دەکرێت، یەکەمیان خزمەتگوزاری سڕینەوە و زیادکردنی ناوەکان لەخۆدەگرێت، قۆناغی دووەمیش خزمەتگوزارییەکانی وەک گواستنەوەی نێوان پارێزگاکان و ڕاستکردنەوەی زانیاری لەخۆدەگرێت".

بەپێی ئامارەکانی وەزارەتی بازرگانی عێراق، تۆمارکردنی زانیاری بۆ زیاتر لە 37 ملیۆن هاوڵاتی لە سەرانسەری سەرجەم پارێزگاکانی عێراق و هەرێمی کوردستان تەواو بووە.

محەمەد حەنون دەشڵێت: "ناونوسین لە هەرێمی کوردستان گەیشتووەتە 85%، هەڵەبجە 89%، هەولێر 87%، سلێمانی 86%، دهۆک 82%".

حەنون ئاماژەی بەوەشکرد، "کۆی ئەو هاوڵاتیانەی زانیاریەکانیان نوێکردۆتەوە لە هەرێمی کوردستان گەیشتووەتە زیاتر لە چوار ملیۆن و 601 هەزار کەس".

وتەبێژی وەزارەتی بازرگانی عێراق هەروەها ڕوونی کردەوە، وەزارەتەکەی چەند دەرفەتێکی بە هاووڵاتیان داوە بۆ نوێکردنەوەی زانیارییەکانیان، دوا وادەش 1ی ئەیلول دەبێت.