شارپرێس:
وەزارەتی پەروەردەی حکومەتی هەرێم ئاگاداری سەرجەم ناوەندەکانی خوێندن دەکاتەوە، 4ی ئەیلول دوا وادەیه بۆ پێشکه‌شکردنی بەشە وانەی مامۆستایان‌و تۆمارکردنی خشتەی بەشەکان.
ئه‌مڕۆ لیژنەی سەرپەرشتیاری سیستەمی ئی – پەروەردە، ناوەندەکانی خوێندنی حکومی لەباخچەی منداڵانەوە تاوەکو پەیمانگاکان ئاگادارکردەوە، 4ی ئەیلولی 2025 دوا وادەی تۆمارکردنی وانەی مامۆستایان‌و خشتەی پۆلەکانە.
لەئاگادارییەکەدا هاتوە؛ "ڕۆژی 4ی ئەیلول، دوا وادەیە بۆ تۆمارکردنی بەشە وانەی دروستی هەر مامۆستایەک لەسیستەمی ئی - پەروەردە بۆ ساڵی خوێندنی 2025 – 2026".
هاوکات ئاماژە بەوەشكراوە، "4ی ئەیلول دوا وادە دەبێت بۆ تۆمارکردنی خشتەی بەشەوانەکانی هەفتەو جیاکردنەوەی پۆل‌و هۆبە لەسیستەمی ئی - پەروەردە بەدروستیی".
وەزارەتی پەروەردە باسى له‌وه‌شكردوه، "کاتژمێر 12ی شەوی 4ی ئەیلول سیستەمی ئی - پەروەردە دادەخرێت‌و پاش کرانەوەشی، دەسەڵاتی گۆڕانکاریکردن نادرێت بەناوەندەکانی خوێندن".