شارپرێس:
بڕیارده‌ری ڕه‌وتی هه‌ڵوێست ئاشكرایده‌كات، موچه‌ى مانگى شه‌ش له‌به‌غداوه ڕه‌وانه ده‌كرێت‌و باسى نه‌وت ناكرێت، هاوكات مه‌ترسیه‌كى گه‌وره له‌سه‌ر موچه‌ى مانگى حه‌وت‌و مانگه‌كانى دیكه ئاشكراده‌كات‌و ده‌ڵێت:"مانگەکانی دواتر لەمەترسیدایە".
عه‌لی حه‌مه‌ساڵح بڕیارده‌ری ڕه‌وتی هه‌ڵوێست ڕایگه‌یاندوه، "موچەی مانگی شەش دێت بەبێ نەوت، بەڵام عێراق پێیوایە؛ دەسەڵاتدارانی هەرێم نەوت نادەن! بۆیە مانگەکانی دواتر لەمەترسیدایە".
به‌وته‌ى عه‌لى حه‌مه‌ساڵح، "بەرپرسانی عێراق وتویانه، بڕیاربوو پێش ناردنی موچەی مانگی (پێنج)، هەرێم نەوت بدات!، ئەوە (شەش) دەنێرین هەرێم نەوتی نەداوە!".
باس له‌وه‌شده‌كات، "هه‌رێم بەعێراقی وتوە، خۆتان لەگەڵ کۆمپانیا نەوتیەکان ڕێکبکەون!، ئه‌وانیش وتویانه، ئێمە گرێبەستمان نییە! ڕێککەوتنی چی بکەین!، ئێمە 16 دۆلار بۆ بەرمیلێک دەدەین‌و ئەوی دیکە هەرێم لەگەڵ کۆمپانیاکان ڕێکبکەوێت!".
وەزارەتی دارایی عێراقیش له‌ڕێگه‌ى میدیاى عێراقیه‌وه ئاشكرایكردوه، ڕێکارەکانی ناردنی موچەی مانگی شەشی موچەخۆرانی هەرێم تەواوکراون‌و تەنها واژۆی بەڕێوەبەری بەشی ژمێرکاریی وەزارەت ماوە، ئه‌مڕۆ یه‌كشه‌ممه لەگەڵ دەستپێکی دەوام، بڕیار لەخەرجکردنی موچەش دەدرێت.
هاوکات لەبارەی وادەی بڵاوکردنەوەی لیستی موچە، سەرچاوەیەک لەوەزارەتی دارایی هه‌رێمه‌وه به‌شارپرێسى وت، "لەگەڵ گەیشتنی موچەی مانگی شەش، لیستی موچە بڵاودەکرێتەوەو دەست بەدابەشکردنی دەکرێت‌و له‌سێ ڕۆژدا كۆتایی به‌دابه‌شكردنى موچه ده‌هێندرێت".
بڕیاریشە له‌م هەفتەیەدا دوو شاند لەهەرێمه‌وه بچنە بەغدا، یەکێکیان بۆ گفتوگۆكردنە لەسەر موچەی مانگەکانی داهاتوو، ئەوەی دیکەشیان بۆ گفتوگۆکردنە لەسەر هەناردەی نەوتی هەرێم لەڕێگەی بەندەری جەیهانی تورکیاوه.
هه‌موو ئه‌مانه‌ش له‌كاتێكدان، نزیكه‌ى 110 ڕۆژ تێپه‌ڕیوه، موچه‌خۆران‌و فه‌رمانبه‌رانى هه‌رێم ته‌نها موچه‌یه‌كیان وه‌رگرتوه.
