شارپرێس:
پسپۆڕانی ئابوریی لەعێراق هۆشداریی لەکاریگەریی سزاکانی یەکێتیی ئەوروپا دژی ئێران لەسەر عێراق دەدەن‌و جه‌ختده‌كه‌نه‌وه، "حکومەت‌و بانکی ناوەندیی ڕوبەڕوی قەیرانێکی گەورە ده‌بنەوە".
ڕۆژی 28ى ئه‌م مانگه، (فەرەنسا، بەریتانیاو ئەڵمانیا) داوای دوبارە سەپاندنی سزاکانی نەتەوەیەکگرتوەکانیان لەسەر ئێران کرد، ئەمەش بەهۆی پابەندنەبونی تاران بەبڕیارە نێودەوڵەتییەکان سەبارەت بەپڕۆژە ئەتۆمییەکەی.
له‌وباره‌یه‌وه زیاد هاشمی پسپۆڕی ئابوریی ڕایگەیاند، "سزاکانی سەر ئێران لەلایەن ئەوروپاوە لەوانەیە بەمزوانە بچنە بواری جێبەجێکردنەوەو بەو هۆیەشەوە ئابوریی ئێران توشی قەیرانێکی توند دەبێت".
ڕونیشیكرده‌وه، "عێراقیش بەهۆی ئەو سزایانەوە کاریگەرییەکی بەهێزو ڕاستەوخۆی بەسەردادێت، چونکە هاوردەکردنی غازو کارەبای ئێران وەک جاران بۆ تۆڕی کارەبای عێراق بەردەست نابێت‌و لەئەنجامدا ڕەنگە چەندین وێستگەی کارەبای عێراق بەتەواوی لەکاربکەون".
پسپۆڕانی ئابوریی لەعێراق پێیانوایە، توندبونی سزاکانی ئەوروپا لەسەر ئێران، جارێکی دیکە کشانەوەی دۆلار لەبازاڕی عێراقدا زیندوو دەکاتەوە، ئەمەش دەبێتە هۆی بەرزبونەوەی نرخی دۆلارو ڕوبەڕوبونەوەی بانکی ناوەندیی‌و حکومەتی عێراق لەبەردەم قەیرانێکی دارایی گەورەدا.
