شارپرێس:
کوبا لە ئێستادا بە قۆناغێکی زۆر سەخت و قەیرانێکی بێوێنەی ئابووریدا تێدەپەڕێت کە ژیانی هاوڵاتییانی بەرەو سەختیی بردووە، ئەم دۆخە نالەبارەش دەرەنجامی ساڵانێکی زۆر لە سیاسەتی کشتوکاڵیی ناکارامە و زیادبوونی گوشارە بەردەوامەکانی ئەمریکایە بۆ سەر ئەم وڵاتە لاتینییە.

 ئیدارەی ئەمریکا بە سەرۆکایەتی دۆناڵد ترەمپ و بە هاوکاری مارکۆ ڕۆبیۆ، هەوڵەکانی چڕکردۆتەوە بۆ بڕینی سەرچاوە داراییەکان و ڕێگریکردن لە گەیشتنی سووتەمەنی، ئەمەش بە مەبەستی ناچارکردنی حکومەتی شیوعی وڵاتەکە بۆ ئەنجامدانی چاکسازیی سیاسی یان دەستبەرداربوون لە دەسەڵات.

 بەهۆی ئەم گەمارۆیانە و نەمانی پاڵپشتییە داراییە دەرەکییەکان کە پێشتر لەلایەن یەکێتیی سۆڤیەت و دواتر ڤەنزوێلاوە دابین دەکران، ئێستا کوبا لە لێواری داڕمانێکی تەواوەتی و کارەساتێکی مرۆیی نزیک دەبێتەوە.

نەمانی سووتەمەنیی بووەتە هۆی پەککەوتنی سێکتەرە گرنگەکان، بەجۆرێک کە کارەبا بە شێوەیەکی بەردەوام دەبڕێت و کۆمپانیا تایبەتەکان کارەکانیان ڕاگرتووە.

 ئەم کورتهێنانە کاریگەریی ڕاستەوخۆی کردۆتە سەر دابینکردنی خۆراک، چونکە کوبا پشت بە هاوردەکردنی زۆربەی پێداویستییە خۆراکییەکانی دەبەستێت و ئێستا نە پارەی پێویست و نە سووتەمەنیی بۆ گواستنەوەی خۆراک لە ناوچەکاندا لەبەرەستدایە.

لایەنی تەندرووستیی و پەروەردەش بێبەش نەبوون لەم قەیرانە؛ نەخۆشخانەکان خزمەتگوزارییەکانیان کەم کردۆتەوە، قوتابخانەکان داخراون و کرێکاران نێردراونەتەوە ماڵەوە بۆ گێڕانەوەی وزە. تەنانەت کەرتی گەشتیاریش کە سەرچاوەیەکی گرنگی داهات بوو، بەهۆی کەمی سووتەمەنیی و هەڵوەشاندنەوەی گەشتە نێودەوڵەتییەکان تووشی پاشەکشەیەکی گەورە هاتووە.

 لەکاتێکدا حکومەتی کوبا داوا لە 10 ملیۆن دانیشتووی وڵاتەکە دەکات بە عەقڵیەتی کاتی جەنگ بەرگەی دۆخەکە بگرن، بەڵام نەبوونی پێداویستییە سەرەکییەکانی وەک خواردن و دەرمان و کۆبوونەوەی زبڵ و خاشاک لە شەقامەکاندا، نیشانەی ئەوەن کە وڵاتەکە لە قووڵترین خاڵی نادڵنیایی ئابووری خۆیدایە لە ماوەی چەندین دەیەی ڕابردوودا.

ئاکۆ عەبدوڵڵا ئاڵی