شارپرێس:

بەغدا لەسەر لێواری تەقینەوەیە، لەنێوان دەنگی گوللەی یاخیبوەکانی ناو دەسەڵات‌و هەڕەشەی توندی حکومەتدا، ناوچەی سەوز دەبێتە گۆڕەپانی یەکلاییکردنەوەی ململانێیەکی خوێناوی، لەکاتێکدا گروپە چەکدارەکان بۆ تۆڵەی خامنەیی ئاگری شەقام خۆشدەکەن، دەستگیرکردنی چەند ئەندامێکی حەشدی شەعبی وەک بۆمبێکی سیاسیی لەناو جەرگەی دەسەڵاتدا تەقیوەتەوە.

لەپەرەسەندنێکی مەترسیداردا، بەغدای پایتەختى عێراق، ڕوبەڕوی شەپۆلێکی نوێی ئاڵۆزی ئەمنیی دەبێتەوە، دوای هەوڵی لایەنگرانی گروپە چەکدارەکان بۆ هەڵکوتانەسەر ناوچەی سەوز، حکومەتی عێراق بێدەنگی شکاندو زنجیرەیەک دەستگیرکردنی لەناو ڕیزەکانی حەشدی شەعبی‌و وەزارەتی ناوخۆ ڕاگەیاند.

تەقەکردن لەناوچەی سەوز.. کێ لەپشت ئاڵۆزییەکانە؟
ڕاوێژکارێکی باڵای حکومەتی عێراق بۆ دەزگاکانی ڕاگەیاندن ئاشکرایکردوه‌، هێزە ئەمنییەکان چەند کەسێکیان دەستگیرکردوە کە سەر بەدەستەی حەشدی شەعبی‌و وەزارەتی ناوخۆن، ئەوان تۆمەتبارن بەوەی کەشی خۆپیشاندانەکانیان قۆستوەتەوە لەنزیک پردی هەڵواسراوو بەدەمانچە تەقەیان لەو هێزە ئەمنییانە کردوە کە پارێزگاری لەدەروازەکانی ناوچەی سەوز دەکەن.

ئەم دەستگیرکردنانە لەکاتێکدایە، فشاری سیاسیی توند هەیە بۆ ئازادکردنیان، بەڵام سەرچاوە حکومییەکە جەختدەکاتەوە، "حکومەت سورە لەسەر سزادانیان‌و هیچ لایەنێکی سیاسیش ناتوانێت دەربازیان بکات".

تۆڵەی خامنەیی‌و سیناریۆی 2020
ئەم ئاڵۆزییانە دوای ئەوەدێن، لایەنگرانی گروپە چەکدارەکان بەهۆی کوژرانی عەلی خامنەیی ڕێبەری باڵای ئێران، ڕژانەسەر شەقامەکان، هێزە ئەمنییەکان بەپەرژینی کۆنکرێتی‌و غازی فرمێسکڕێژ ڕێگرییان لەخۆپیشاندەران کرد تا کارەساتی ساڵی 2020و سوتاندنی باڵیۆزخانەی ئەمریکا دوبارەنەبێتەوە.

جەنگی درۆنەکان‌و بۆردومانی نادیار
لەکاتێکدا بەغدا لەناو تەپوتۆزی غازی فرمێسکڕێژدایە، ئاسمانی عێراق بوەتە مەیدانی جەنگێکی بێدەنگ، گروپە چەکدارەکان بەدرۆن هێرشیانکردەسەر فڕۆکەخانەی هەولێر، بنکەی هەریرو فڕۆکەخانەی بەغدا، هاوكات پێگەکانی کەتیبەکانی حزبوڵڵا لە(جورف سەخەر، دیالەو قائیم) ڕوبەڕوی بۆردومانی تەمومژاوی دەبنەوە کە تائێستا سەرچاوەکەیان بەفەرمی ڕانەگەیەندراوە.

حکومەتی عێراق بەڵێندەدات، بەمزوانە ئەنجامی لێکۆڵینەوەکان‌و ناوی ئەو گروپانە بڵاوبکاتەوە کە لەپشت هێرشە درۆنییەکانەوەن، ئەمەش وەک پەیامێکی ڕاستەوخۆ بۆ لایەنە یاخیبوەکان.

کۆتاییەکی نادیار
ئێستا بەغدا لەنێوان دوو بژاردەی سەختدایە، یان سەپاندنی یاساو ڕوبەڕوبونەوەی ئەو گروپانەی لەناو جەرگەی دەسەڵاتەوە یاخی دەبن، یان تەسلیمبون بەفشاری سیاسیی‌و گەڕانەوە بۆ چوارگۆشەی یەکەم، لەکاتێکدا حکومەت بەڵێنی ئاشکراکردنی ناوی گروپە سێبەرەکان دەدات، شەقامی عێراقی چاوەڕێیە ببێنێت ئایا ئەم دەستگیرکردنانە دەبنە سەرەتایەک بۆ گەڕانەوەی شکۆی دەوڵەت، یان تەنها نمایشێکی کاتین‌و لەبەردەم هەڕەشەی چەکدارەکاندا دادەڕمێن؟.