شارپرێس:
وەزارەتى نەوتى عێراق ڕایگەیاند "لە مانگى
ڕابردوودا زیاتر لە ١٠٧ ملیۆن بەرمیل نەوت هەناردە کراوە و هیچ بڕە نەوتێک لەو
ڕێژەیە لە کێڵگەکانى کەرکوکەوە هەناردە نەکراوە".
ئەمڕۆ پێنجشەممە عاسم جیهاد وتەبێژى وەزارەتى نەوتى
عێراق ڕایگەیاندوە "لە مانگى ڕابردوودا زیاتر لە ١٠٧ ملیۆن و ٥٣٠ هەزار
بەرمیل نەوت هەناردەکراوە و بڕى داهاتەکەشى زیاتر لە هەشت ملیار و ٥٥ ملیۆن دۆلار
بووە".
عاسم جیهاد ئاماژەى بەوەش کردووە "کۆى گشتى ئەو
نەوتەى هەناردەکراوە لە کێڵگە نەوتییەکانى ناوەڕاست و باشورى عێراقەوە بووە و هیچ
بڕە نەوتێک لە کێڵگەکانى کەرکوکەوە هەناردە نەکراوە".
وتەبێژى وەزارەتى نەوتى عێراق ئاماژەی بەوەشداوە "تێکڕاى
هەناردەکردنى ڕۆژانەى نەوت، سێ ملیۆن و ٤٦٩ هەزار بەرمیل بووە و هەر بەرمیلێکیش بە
٧٤ دۆلار و ٩١٢ سەنت فرۆشراوە".
هـ ـ ر