شارپرێس/ وەرگێران: لوقمان حاجی قادر
فەیسەڵ میقداد، جێگری وەزیری دەرەوەی سوریا ڕۆژی 4 شەممە گەشبینی خۆی نیشاندا سەبارەت بەو گفتوگۆیانەی لەگەڵ هێزە كوردییەكان لەئارادایەو وتی: كوردەكان دەیانەوێت لەگەڵ دیمەشق بگەن بەرێككەوتن‌و ئاماژەی بەوەشدا دانوستانەكان بەنێوەنگیری ڕوسیا قۆناغێكی باشی بڕیووەو لە كۆتایدایە.
هێزەكانی سوریای دیموكرات، كە یەكینەكانی پاراستنی گەل یەپەگە پێكهاتەی سەرەكییەتی، سنوریكی بەرفراوانی باكووری سوریایان لەژێر دەستدایە، كە لەئێستادا هەوڵی زیندووكردنەوەی گفتوگۆكانیان دەدەن لەگەڵ دیمەشقدا، ئەمەش دوای ئەوەی دۆناڵد ترامپی سەرۆكی ئەمریكا بڕیاری كشانەوەی هێزەكانی وڵاتەكەی لەسوریادا.
هێزەكانی سوریای دیموكرات لەوە دەترسن ئەو بۆشاییەی ئەمریكا جێیدەهێڵێت وا لەتوركیا بكات بۆ ئەنجامدانی كردەیەكی سەربازی دژ بەڕۆژهەڵاتی فوڕات هەنگاو بنێت، بۆیە زووبەزوو چەند كەناڵێكی گفتوگۆیان لەگەڵ دیمەشقدا كردەوە.
ئەو لێدوانانەی میقدادی بۆ ڕۆژنامەنووسان بۆ یەكەمجارە سەبارەت بەدانوستانەكانی نێوان كوردەكان و دیمەشق بۆ بڵاوەپێكردنی هێزەكانی حكومەتی سوریا لەسەر سنووری توركیا بڵاودەكرێتەوە، كە ئەوە هەنگاوێكە بۆ رێگری لەهەڕەشەكانی ئەنقەرە.
لەوەڵامی پرسیارێكیش سەبارەت بەڕەووشی گفتوگۆكان میقداد وتی: "زۆر پێویستە هەمیشە گەشبینبین، ئەزموونی پێشوومان لەگەڵ گروپە كوردییەكان جێگەی دلخۆشی نەبوو، بەڵام ئێستا ڕووداوەكان بەرەو كۆتاین".
ناوبراو وتیشی: گفتوگۆكان كۆك و تەبایە لەگەڵ ئەو بەیاننامانەی لەو ماوەیەی دوایدا گروپە كوردییەكان دەریان كردووەو "ئەگەر كوردەكان بانگەشەی ئەوە دەكەن، كە بەشێكی دانەبڕاون لە دەوڵەت و گەلی سوریا، ئەوا ئێستا بارودۆخەكە ساز و لەبار و گونجاوە، بۆیە من گەشبینم".
میقداد هەروەها وتی: "ئێمە هانی ئەو توێژ و گروپە سیاسییانە دەدەین، كە دڵسۆزی بنوێنن لە گفتوگۆكانیاندا لەگەڵ دەوڵەتی سوریا"، ئاماژەی بەوەش كرد، دەبێت ئەوە لەبەرچاو بگرین، كە هیچ بژاردەیەكی دیكەمان نییە جگە لە دانوستان و گفتوگۆ.
سیاسییەكی دیاری كوردیش لەهەفتەی پێشوو وتی: ئەو گروپە كوردییانە لەو گفتوگۆیانەی، كە لەو ماوەیەی پێشوودا لە ڕوسیا ئەنجامیانداوە، نەخشەڕێگەیەكیان بۆ پێكهاتن لەگەڵ دیمەشق خستۆتەڕوو.
هەروەها وتی: ئەگەر ڕێككەوتنەكە سەربگرێت، ئەوا دوو گەورەترین ناوچەی سوریا، كە جەنگی 8 ساڵە پەرتپەرتی كردوون دووبارە یەكدەگرنەوە، ئەو كات لە باكووری ڕۆژئاوای وڵات ناوچەیەك دەمێنیت بەدەست ئۆپۆزسیۆنی چەكداری سوریای سەر بە توركیا.
ڕێككەوتنێكی لەو جۆرە بەڕەكە لەژێر پێی ئەنقەرە دەردێنێت، كە بە پاساوی ڕیشەكێشكردنی مەترسی كوردەكان هەڕەشەی داگیركردنی ڕۆژهەڵاتی فوڕات دەكات، بەڵام ئامانجە دوورەكەیان داگیركردنی باكووری ڕۆژهەڵاتی سوریایە، یان بەلایەنی كەمەوە جێگیركردنی گروپە چەكدارەكانی سەر بەخۆیانن لەو ناوچەیەدا، ئەم كارەش لەلایەن دیمەشقەوە ڕەتدەكرێتەوە، ئەمە جگە لەوەی ڕوسیا و كوردەكانیش پێی ڕازینین.
توركیا تا ئێستا دووجار سوپاكەی ناردووەتە سوریا بۆ هێرشكردنەسەر یەكینەكانی پاراستنی گەل، ئێستاش هێرشكردنەسەر ڕۆژهەڵاتی فوڕاتی دواخستووە، چونكە هێزەكانی ئەمریكا لەو ناوچەیە جێگیرن.
جۆن بۆڵتۆنی ڕاوێژكاری ئاسایشی نەتەوەیی ئەمریكا پێش سەردانەكەی بۆ توركیا لەڕۆژی دووشەممەی رابردوو پێداگری لەسەر ئەوە كردەووە، كە وڵاتەی لە سوریا ناكشێتەوە تاوەكو گەرەنتی سەلامەتی هاوپەیمانە كوردەكانی مسۆگەر نەكات، ئەمەش ئەنقەری توڕەكرد، واشی لەرەجەب تەیب ئەردۆغانی سەرۆك كۆماری توركیا كرد بینینی جۆن بۆڵتۆن ڕەتبكاتەوەو هێرشێكی توندیشی كردەسەر.
چاودێرانیش بەدووری نازانن ئەمریكا لەو گفتوگۆیانەوە نزیكبێت، كە لە نێوان دیمەشق و كوردەكان بە سەرپەرشتی ڕوسیا بەڕێوەدەچن، لەوانەشە هەر ئەوە هۆكاری بەلەسەبوون و هیستریاكەی توركیا بێت.
میقداد بە زمانێكی متمانەبەخۆبووەوە وتی: لەوە دڵنیایە، كە هەموو هێزە بیانییەكان لە سوریا دەكشێنەوە، ئەمەش گریمانەی ئەوە بەهێز دەكات لەژێر پەردەوە گفتوگۆی نێوان ئەمریكا و ڕوسیا لەوبارەوە لە ئارادابێت.
