شارپرێس:
ژمارەیەک ڕێکخراو و چالاکوانی کۆمەڵایەتی داوکارییەک دەربارەی کەمکردنەوەی نرخی پەیوەندییەکان ئاڕاستەی نوسینگەی سلێمانی پەرلەمانی عێراق دەکەن.

ئەمڕۆ یەک‌شەممە کۆمەڵێک لە رێکخراوەکانی کۆمەڵگەی مەدەنی یاداشتێکی ناڕەزاییان دایە نوسینگەی سلێمانی پەرلەمانی عێراق و داوایان کرد نرخی پەیوەندی تەلەفۆنی و هێڵەکانی ئینتەرنێت کەمبکرێتەوە.

ئەوەش دوای ئەو کەمپینە دێت کە لە لە ماوەی رابردوودا چەند چالاکوانێک لە تۆڕی کۆمەڵایەتی فەیسبووک  دژی گرانی نرخی پەیوەندی تەلەفۆنی و هێڵەکانی ئینتەرنێت ڕایانگەیاندبو.

لەبارەی وردەکاری یاداشتەکە چالاکوانان ڕایانگەیاندوە "ناڕەزایەتییەکان لەسەر نرخی هێڵەکانی ئینتەرنێت و پەیوەندی تەلەفۆنی لەلایەن بەکارهێنەرانەوە هەبووە، ئێمەش ویستمان ئەو ناڕەزایەتییە کۆبکەینەوە و بەشێوەیەکی مەدەنی و رێکخراو ئاراستەی ئەندامانی ئەنجوومەنی نوێنەرای عێراقی بکەین".

ئەو چالاکوانانە باسیان لەوەکردوە "نرخی هەر کارتێکی 5 هەزار دیناری تەلەفۆنەکان لە بازاڕ بە سەرووی 6 هەزار دەفرۆشرێت و کارتێکی 10 هەزاریش بە سەرووی 12 هەزار دینار، ئەمەش جێگەی پرسیارە لای خەڵک و ئێمە دەمانەوێت ئەو پرسیارە لەڕێگەی ئەندامانی ئەنجوومەنی نوێنەرانی عێراقەوە وەربگرین و هەروەها چارەسەری گرانی نرخی کارتی سەرجەم تەلەفۆن و کۆمپانیاکانی بوار ئینتەرنێت بکرێت".

هـ ـ ر