شارپرێس:
حەیدەر عەبادی، سەرۆکی كوتلەی نەسر و سەرۆک وەزیرانی پێشووی عێراق رایگەیاند، ھەماھەنگی لەگەڵ ھەرێمی کوردستان و پێگەی ھەرێم لە ئێستادا زۆر گرنگە بۆ بنیادنانەوەی عێراقی سیاسی.
حەیدەر عەبادی، سەرۆکی كوتلەی نەسر و سەرۆک وەزیرانی پێشووی عێراق لەگەڵ بەشیر حەداد، جێگری سەرۆکی ئەنجومەنی نوێنەرانی عێراق کۆبوەوە، لە کۆبونەوەکەدا باسیان لە دۆخی عێراق و پەیوەندی نێوان هەرێمی کوردستان و عێراق کرد.
بەپێی راگەیەندراوی کۆبونەوەکە، هەردولا جەختییان لە گرنگی هاوهەڵوێستی و چڕکردنەوەی هەوڵەکانی گشت لایەنە سیاسییەکان کرد بۆ بوژانەوەو سەر لەنوێ بونیاتناوەی وڵات بەتایبەت دوای ئازادکردنی زۆربەی ناوچەکان لە ژێردەستی داعش.
ئەوەش خراوەتەڕوو، لە کۆبونەوەکە باس لەوەکراوە "بەغدا و هەرێم هەردولا پێویستیان به یەكدی ھەیەو عێراقیش پێویستی بە هەموانە".
عەبادی و بەشیر حەداد هاوڕابونی لەسەر ئەوەی، "پێویستە هەوڵە سیاسییەکانی لایەنەکان چڕ بکرێتەوە و کەشوهەوا بڕەخسێنرێت بۆ ئەوەی هەموو لایەک بەشدار بێت بۆ پێشخستنی کایەی سیاسی عێراق و هەروەها بەردەوامیدان بە هاوکاری و هەماهەنگی نێوان دەزگاکانی یاسادانان و گشت دەزگاکانی تری وڵات، بۆ بەجێگەیاندنی بەرنامەکانی حکومەت بەجۆرێک خزمەت بە هاووڵاتیان بگەیەنێ".
عەبادی لە کۆبونەوەکەدا وتویەتی، "ئەم قۆناغە پێویستی بە یەکڕیزی و ھەماھەنگی لەگەڵ ھەرێمی کوردستان و پێگەی ھەرێم لە ئێستادا زۆر گرنگە بۆ بنیادنانەوەی عێراقی سیاسی".
سەرۆکی كوتلەی نەسر رونیشکردەوە، "عێراق پێویستی بە یەکدەنگی گشت لایەک هەیە بۆ تێپەڕاندنی و خۆدوورخستنەوە لە کێشمەکێشی سیاسی".
ه.م