شارپرێس.. ئاکۆ عەبدوڵلا ئاڵی:
توێکاریکردنی لاشەی پاشای  پۆپ و ئەفسانەی گۆرانی ، مایکڵ جاکسۆن ، نهێنیی تازە و سەرنجراکیش دەربارەی باری تەندرووستیی و جەستەی ئەو گۆرانیبێژە  ئاشکرا دەبێت .

رۆژنامەی "میرۆر' ی بەریتانی ئاشکرای کردووە  ، بەگوێرەی راپۆرتی توێکاری لاشەی مایکڵ جاکسۆن ، جەستەی ئەو هونەرمەندە پڕ بووە لە شوێنەواری برین ، بەجۆرێک هەردوو قۆڵەکانی، شوێنەواری برینی پێوە بووە  ، ئەوەیش بەهۆی خواردنی ئەو دەرمانانەی کە بۆ چارەسەری خەوزڕانی بەردەوام " خەولێڕۆیشتن" بەکاری دەهێنان .

هەروەک پزیشکەکان چەندین شوێنەواری دیکەی برینیان لە جەستەی جاکسۆندا دۆزیوەتەوە ، کە بەهۆی ئەو نەشتەرگەرییە جوانکارییانەوە بووە کە مایکل جاکسۆن لەماوەی ژیانیدا کردوونی ، دیارترینیشیان دوو شوێنەواری برین لە پشت گوێیەوە ، دوو برینی تر لە لاکانی لووتی.

راپۆرتەکە ئاماژە بۆ ئەوە دەکات کە شوینەواری تر لە دەوروبەری گەردنی و لەسەر قۆڵەکانی و مەچەکی هەبووە ، کە پزیشکان دواتر گەیشتوونەتە ئەو ئەنجامەی ئەوە بەهۆکاری ئەو نەشتەرگەرییانەوە بووە کە کردوونی ، ئەوە سەڕای ئەوەی جاکسۆن چەند تاتۆیەکی جوانکاری لەسەر جەستەی هەبووە.

مایکل جاکسۆن بەهۆی گرفتار بوونی بەو  سووتاوییەی کە رووداوێکی ساڵی ١٩٨٤و لەکاتی وینەگرتنی بۆ ریکلامێکی کۆمپانیای پیپسی  تووشی بوو ،  تووشی قژ هەڵوەرینی نیمچە تەواوەتی بوو .

هەروەک سووربوونەوە و  رووشان لە دەوروبەری سینگ و پەراسووەکانی هەبووە ،کە ئەویش  بەهۆی ئەوەی کاتێک پزیشک و فریاگوزارەکان لە رۆژی ٢٥ ی حوزەیرانی ساڵی ٢٠٠٩مایکڵ جاکسۆنیان بەبێ هۆشی لەمالەکەی خۆیدا بینیوە ،  هەوڵییان داوە گیانی لە مردن رزگار بکەن .

شایانی باسە مایکڵ جاکسۆن لە ساڵی ٢٠٠٩ و لە تەمەنی ٥٠ ساڵیدا بەهۆی خواردنی بڕیکی زیاد لەپێویست لە سڕکەری برین ، گیانی لەدەستدا.
سەرچاوە:  sputnik news