شارپرێس: كایلی جینەری نمایشكاری جلوبەرگی ئەمەریكی و خوشكی كیم كارداشیان ،لەلایەن گۆڤاری "فۆربسی"ی ئەمەریكییەوە بەشێوەیەكی فەرمی نازناوی "بچووكترین ملیاردێری پشتبەخۆبەستوو لەمێژوودا"ی پێبەخشرا ، ئەوەش لەچوارچێوەی ئەو لیستەی، كە ساڵانە ئەو گۆڤارە بڵاوی دەكاتەوە . كایلی توانی ئەو نازناوە لە مارك زوكەربرگی دامەزرێنەری تۆڕی كۆمەڵایەتی فەیس بووك وەربگرێت دوای ئەوەی توانی لەتەمەنی ٢١ ساڵی بڕی یەك ملیار دۆلار كۆبكاتەوە ، ئەوە لەكاتێكدا زوكەربرگ كاتێك توانی هەمان نازناو وەربگرێت كاتێك تەمەنی ٢٣ ساڵ . مارك زوكەربرگ لە لیستی دەوڵەمەندترینەكانی ساڵی ٢٠١٩ بە كۆكردنەوەی ٦٢،٣ ملیار دۆلار پلەی هەشتەمی گرتووە. كایلی یەكەم ئەندامی خێزانەكەیەتی، كە توانیویەتی ملیارێك دۆلار كۆبكاتەوە ، نهێنی سەركەوتنیشی دەگەڕێنرێتەوە بۆ ئەو سەركەوتنەی كۆمپانیاكەی بەدەستیهێناوە، كە تایبەتە بە كەلوپەلی جوانكاریی ، ئەو كۆمپانیایەش ساڵی ٢٠١٥ دامەزرێنراوەو نرخەكەشی بە نزیكەی ٩٠٠ ملیۆن دۆلار دەخەمڵێنرێت . كایلی پشكی لەسەدا سەدی كۆمپانیاكەی هی خۆیەتی ، ئەوە جگە لەوەی لەبواری كەرتی خانووبەرەش خاوەن موڵك و ماڵێكی زۆرە . كایلی شانازی بەوەوە دەكات، كە لە تۆڕی كۆمەڵایەتیش لەرووی ژمارەی هەوادارانییەوە سەركەوتنیكی گەورەی بەدەستهێناوە ، ئەمەش وایكردووە پێش دامەزراندنی كۆمپانیاكەی كڕیاریكی باشی بۆ پەیدا بكات. دوای ئەوەی كایلی نازناوی بچووكترین ملیاردێری بەدەستهێنا وتی: "ئەوە بۆ من چاوەراون نەكراو بوو ، تەنانەت لە داهاتووشدا ، بەڵام دەبێت دان بەوەدا بنێم ئەوە هەستێكی زۆر خۆشم پیدەبەخشێت " سەبارەت بە ئایندەی كۆمپانیاكەشی ، كایلی لەئایندەیەكی دوور چاوەرێی دوارۆژێكی گەش بۆ كۆمپانیاكەی دەكات ، بەڵام كریس جینەر ی دایكی بەدووری نازانێت كایلی لەئایندە كۆمپانیاكەی بفرۆشێت . وەرگێڕان: ئاكۆ عەبدوڵڵا ئاڵی