شارپرێس:
بەبۆنەی رۆژی پیشەسازییە بەرگرییەكانی ئێران، دەزگاكانی راگەیاندنی فەرمی ئێران دروستكردنی سیستەمێكی موشەكی دوورمەودا و گوازراوەی نوێی ئێرانیان ئاشكراكرد، كە لەناوخۆی ئەو وڵاتە بەرهەمهێنراوە.
ئاژانسی "فارس"ی ئێرانی بڵاویكردەوە، حەسەن روحانی سەرۆككۆماری ئێران پەردەی لەسەر سیستەمی بەرگری ئاسمانی موشەكی "پاڤار ٣٧٣" لاداوە .
جگە لەوەی تەلەفزیۆنی فەرمی ئێرانی ئەو دیمەنانەی پیشانداوە، كە حەسەن روحانی لەرێورەسمێكدا پەردە لەسەر سیستەمی موشەكی "پاڤار -٣٧٣" لادەدات، كە بەپێی قسەی شارەزا ئێرانییەكان سیستەمەكە هاوتای سیستەمی بەرگری ئاسمانی "ئێس-٣٠٠"ی روسییە .
ئاژانسە ئێرانییەكە باسی لەوەش كردووە، كە "پاڤار-٣٧٣" ، درووستكراوی ئێرانە و توانای ئەوەی هەیە لەیەك كاتدا ڕووبەرووی ٦ ئامانج ببێتەوە، جگە لەوەی توانای ئەوەی هەیە لەیەك كاتدا ١٠٠ ئامانج بدۆزێتەوە و بەپێی لەپێشیان بۆ رووبەروبوونەوەیان پۆلێنیان بكات .
وەرگێڕان: ئاكۆ عەبدوڵلا ئاڵی