شارپرێس:
وەزیری نەوتی عێراق رایگه‌یاند، گفتوگۆکانیان له‌گه‌ڵ هه‌رێمی كوردستان بۆ رادەستکردنی 250 هەزار بەرمیل نەوت له به‌رامبه‌ر پێدانی پشكی له‌سه‌دا 17ی عێراق به‌رده‌وامه.
سامر غەزبان، وەزیری نەوتی عێراق ئه‌مڕۆ لە کۆنفرانسێکی رۆژنامەوانیدا به رۆژنامه‌نوسانی راگەیاند، "رێککەوتنی نەوتی لە نێوان هەرێمی کوردستان و بەغدا کاریگەری لەسەر بودجەی 2020ی عێراق دەبێت".
ده‌شڵێت، "گفتوگۆکانی نێوان هەولێر و بەغدا لەسەر رادەستکردنی 250 هەزار بەرمیل نەوت بە حکومەتی عێراق بەردەوامە و چاوەڕوانی وەڵامی ئەرێنی هەرێمی کوردستانین".
وه‌زیری نه‌وتی عێراق رونیكرده‌وه، "لە بودجەی 2020ی عێراق نرخی بەرمیلێک نەوت بە 50 دۆلار خەمڵێندراوە".
ماوەیەكە چەند شاندێكی فەرعی لەنێوان هەردوو حكومەتی عێراق‌و هەرێمی كوردستان پێكهێنراوەو تائێستاش چەند گفتوگۆیەكیان لەبارەی كێشەكانی نێوان هەولێرو بەغدا كردووە.
بەپێی ئەو زانیارییانەی لەسەرچاوەیەكی ئاگادار دراوە بەشارپرێس، لەمیانی گفتوگۆكان بۆ ئەنجامدانی رێككەوتن، شاندەكانی هەرێم چەند مەرجێكیان خستووەتەڕوو، لەبەرانبەردا شاندەكانی بەغداش چەند مەرجێكیان خستووەتەڕوو.
هەر بەپێی زانیارییەكان، هەردوولا بەمەرجی یەكتری رازی نەبوون‌و رەتیانكردووەتەوە، بەتایبەتی شاندەكانی بەغدا، كە مەرجەكانی شاندی هەرێمیان بە قورس‌و ناواقیعی لەقەڵەمداوە.
هەرێمی كوردستان بۆ رادەستكردنی نەوت بەرێژەی 250 هەزار بەرمیلی رۆژانە، داوای ئەوەی كردووە، كە قەرزی كۆمپانیا نەوتییەكان‌و فەرمانبەرانی هەرێم بداتەوە، كە بڕەكەی بە 80 ملیار دۆلار خەمڵاندووە.
لەبەرانبەردا حكومەتی عێراق ئەوەی رەتكردووەتەوەو مەرجی ئەوەی داناوە، كە جگە لەداهاتی ئەو 250 هەزار بەرمیلە، دەبێت داهاتەكانی تریش وەك داهاتی دەروازە سنوورییەكان بگەڕێنرێتەوە بۆ بەغدا، كە هەولێر ئەوەی رەتكردووەتەوە.
ه.م
