شارپرێس:
عادل عه‌بدولمه‌هدی، سه‌رۆك وه‌زیرانی عێراق و مایك پۆمپیۆ، وه‌زیری ده‌ره‌وه‌ی ئه‌مریكا په‌یوه‌ندی ته‌له‌فۆنیان ئه‌نجامداو پۆمپیۆ رایگه‌یاند، خۆپیشاندانی ئاشتیانە رەگەزێکی بنەڕەتییە لە کۆمەڵگە دیموکراتییەکاندا و "کوشتن و رفاندنی خۆپیشاندەران رەتدەکەینەوە".
نوسینگه‌ی سه‌رۆك وه‌زیرانی عێراق بڵاویكرده‌وه، عادل عه‌بدولمه‌هدی، سه‌رۆك وه‌زیرانی عێراق په‌یوه‌ندی ته‌له‌فۆنی له‌گه‌ڵ مایك پۆمپیۆ، وه‌زیری ده‌ره‌وه‌ی ئه‌مریكا ئه‌نجامداوه و له‌باره‌ی دۆخی عێراق و پرسی تیرۆره‌وه گفتوگۆیان كردووه.
ئاماژه به‌وه‌شكراوه، سه‌رۆك وه‌زیرانی عێراق جه‌ختی له په‌یوه‌ندیه دوقۆڵییه‌كانی عێراق له‌گه‌ڵ ئه‌مریكا و وڵاتانی ناوچه‌كه كردووه‌ته‌وه و هاوكات رایگه‌یاندووه، حكومه‌تی عێراق له‌گه‌ڵ خۆپیشاندانی مه‌ده‌نیانه و داوا ره‌واكانی خۆپیشانده‌راندایه.
هاوكات مایک پۆمپیۆ وەزیری دەرەوەی ئەمریکا لە پەیوەندییەکی تەلەفۆنیدا رایگه‌یاندووه، "خۆپیشاندانی ئاشتیانە رەگەزێکی بنەڕەتییە لە کۆمەڵگە دیموکراتییەکاندا، كوشتن و رفاندنی خۆپیشاندەران لەلایەن حکومەت و بەکارهێنانی هێزی کوشندە لە دژیان، رەتدەکەینەوە".
پۆمپیۆ راشیگه‌یاندووه، "پێویسته هەنگاوی خێرای هەڵگیرێت بۆ چارەسەرکردنی داوا رەواکانی خۆپیشاندەران لەڕێگای ئەنجامدانی چاکسازی و چارەسەری گەندەڵی".
ئه‌وه‌شی وتووه، "ئەمریکا بەردەوام دەبێت لە پشتیوانیکردنی عێراقێکی بەهێزو خاوەن سەروەری گەشەکردوو، لەسەر بنەمای چوارچێوەی رێککەوتنی ستراتیژی ئیمزاکراوی نێوان هەردوو وڵات".
