شارپرێس:
وەزارەتی تەندروستی روسیا ڕێنمایی دەدات بەوەی هەموو كەسێكی ئاسایی ساڵانە نابێت لە ٢٤ كیلۆگرام شەكر بەكاربهێنێت.
بەگوێرەی پێگەی "پراڤدا"ی روسی، دكتۆر تاتانیا بۆجارۆڤا پزیشكی كوێرە گڵاندەكان دەڵێت: ئەگەر دەستبەرداری خواردنی شەكر ببیت، ئەوە دوای دوو رۆژ هەست دەكەیت تەندروستیت بەرەو باشتر چووە.
ئەو پزیشكە رووسە ئاماژەی بۆ ئەوە كردووە، كە دەكرێت گلووكۆز و بارێكی دەروونی باش لەڕێگای خواردنی دانەوێڵە و میوە و سەوزەكانەوە بەدەستبهێنیت.
باسی لەوەش كردووە، كە بەهۆی شەكرەوە جەستە ڤیتامینەكانی كۆمەڵەی بی و كالیسیۆمی لەدەست دەچێت، ئەوەش رێژەی ئەنسۆلین بەرز دەكاتەوە، دواتریش سەردەكێشێت بۆ نەخۆشی شەكرە.
سەبارەت بەوەی ئەگەر بێت و لەجیاتی شەكرەكان پەنا ببرێت بەر خواردنی میوە ئەوە چی بەسەر جەستەدا دێت بوچارۆڤا دەڵێت: ئەوە پرۆسەی هەرسكردن باشتر دەبێت و كاركردنی ریخۆڵەكان بەرەو باشتر دەڕوات و رەنگی پیست جوانتر دەبێت و دۆخی خەوتنیش سروشتیتر دەبێت، ئەوە جگە لەوەی پەستانی خوێن دادەبەزێت و كۆلیسترۆڵ دێتە ئاستە سروشتییەكەی و چالاكییەكانی مێشك باش دەبنەوە و بەرگری جەستەش بەهێزتر دەبێت.
وەرگێڕان: ئاكۆ عەبدوڵڵا ئاڵی
