شارپرێس:
جەنەراڵ سێرگی سۆرۆڤكین ، فەرماندەی هێزە گەردوونی - ئاسمانییەكانی روسیا رایگەیاند، موشەكی "ئێس-٥٠٠"ی نوێی روسی، دەتوانێت موشەكە سەروو دەنگەكان لە بۆشایی ئاسماندا بپێكێت و تێكیانبشكێنێت.
بەگوێرەی هەواڵێكی پێگەی "روسیا تودەی"، سۆرۆڤكین لە چاوپێكەوتنێكی لەگەڵ كەناڵێكی ئاسمانی روسی رایگەیاندووە، بەپێی ئەو تایبەتمەندیانەی بۆ سیستەمی بەرگری ئاسمانی "ئێس-٥٠٠" دانراوە، موشەكەكانی دەتوانن پێش لە ئامانجگەلێك بگرن و تێكیانبشكێنن، كە بەخێراییەك لە خێرایی دەنگ زیاتر برۆن .
فەرماندەی هێزە گەردوونی –ئاسمانییەكانی رووسیا باسی لەوەش كردووە، كە سیستەمەكە لە توانای مامەڵەكردنی لەگەڵ ئامانجە دینامیكی و درۆنەكاندا لە جیهاندا هیچ سیستەمێكی تر هاوشێوەی نییە.
سیستەمی بەرگری ئاسمانی "ئێس-٥٠٠" ی روسی، نەوەیەكی نوێی سیستەمی موشەكیی زەوی بەئاسمانە، كە تایبەتە بە پێشگرتن لە موشەكە بالیستییە كیشوەبرەكان و سیستەمی كۆنترۆڵكردن و ئاگاداركردنەوەی پێشوەختە دژ بە فرۆكە رادار شێوێنەكان (شەبەحەكان ) .
ئەو سیستەمە نەوەی پێشخراو و نوێكراوەی سیستەمی دژە ئاسمانی "S-400 Triumph 'كە مەوداكەی ٦٠٠ كیلۆمەترە، بەڵام " ئێس-٥٠٠ " دەتوانێت لەیەك كاتدا ١٠ موشەكی بالیستی بەئامانج بگرێت كە لەیەك چركەدا حەوت كیلۆمەتر بروات و دەشتوانێت لەمەودای ٨٠٠ بۆ ٩٠٠ كیلۆمەتر ئامانجەكەی بدۆزێتەوە.
لە مانگی شوباتی رابردوو ، ئەلێكسی كیڤۆرۆچكۆ وەزیری بەرگری رووسیا رایگەیاندبوو هەركاتێك سیستەمەكە ئامادە بوو رادەستی سوپای رووسیا دەكرێت.
ساڵی رابردووش ، وەزیری بەرگری رووسیا ئاماژەی بۆ ئەوە كردبوو كە لەساڵی ٢٠٢٠ دا سیستەمی دژە ئاسمانی "ئێس-٥٠٠" دەخرێتە ناو خزمەتی سەربازیی لەناو سوپای رووسیادا .
وەرگێڕان: ئاكۆ عەبدوڵڵا ئاڵی