شارپرێس:

گۆرانیی منداڵێکی تەمەن 11 ساڵانی کوردی خەڵکی ڕۆژئاوای کوردستان بەناوی (ڕۆهان سه‌فۆ)، کە پێشکەشی یانەی وەرزشیی (ئامەد سپۆرت)ی کردوە دوای سەرکەوتنی بەسەر یانەی بێشیکتاشی تورکیدا، کاردانەوەی یەکجار بەربڵاوو کتوپڕی میدیایی لەناو تورکیا، باکورو ڕۆژئاوای کوردستاندا لێکەوتەوە؛ هاوکات هۆژداربونی دەزگاکانی چاودێریی بوەتە هۆی داخستنی سەرجەم هەژمارەکانی ئەم منداڵە لەتۆڕە کۆمەڵایەتییەکاندا.

ڕۆهان سه‌فۆ کێیەو ڤیدیۆکەی چی تێدایە؟
ڕۆهان منداڵێکی بەھرەمەندی تەمەن 11 ساڵانە کە بنەچەی خێزانەکەی دەگەڕێتەوە بۆ شاری قامیشلۆ لەڕۆژئاوای کوردستان (سوریا)، بەڵام لەئێستادا لەگەڵ خێزانەکەیدا نیشتەجێی شاری (ئێلهـ ـ باتمان)ن لەباکوری کوردستان.

ڕۆهان دوای سەرکەوتنە مێژوییەکەی یانەی ئامەد سپۆرت بەسەر یانەی بەناوبانگی بێشکتاشی تورکیدا، گۆرانییەکی حه‌ماسی‌و پشتگیریی بۆ ئامەد سپۆرت دەچڕێت؛ ڤیدیۆکە تەنها لەماوەیەکی یەکجار کورتدا سنورەکان دەبەزێنێت‌و نزیکەی پێنج ملیۆن بینەری لەسەرتاسەری جیهان‌و ناوچەکەدا تۆمارکرد.

کاردانەوەکان لەتورکیاو داخستنی لاپەڕەکانی
لەناوخۆی تورکیادا، بڵاوبونەوەی خێرای ئەم گۆرانییە پاڵپشتییە بۆ یانەی ئامەد سپۆرت (کە بەیانەیەکی ناسنامەخواز ناسراوە) کێشەی هێنایەوە کایەوە؛ بەجۆرێک دەسەڵاتدارانی چاودێریی سیبرانی، سەرجەم پەیج‌و هەژمارە فەرمییەکانی ڕۆهانیان لەسۆشیاڵ میدیا بەتەواوی داخست بەمەبەستی ڕێگریکردن لەبڵاوبونەوەی زیاتری دەنگ‌و ناوەڕۆکەکەی.

هاوسۆزیی بەربڵاو لەباکورو ڕۆژئاوای کوردستان
بڕیاری داخستنی لاپەڕەکانی ڕۆهان پەرچەکرداری تەواو پێچەوانەی لێکەوتەوە؛ لەسەرتاسەری شارەکانی باکوری کوردستان (وەک ئامەد، باتمان، مێردین)و تەواوی شارەکانی ڕۆژئاوای کوردستان (وەک قامیشلۆو کۆبانێ)، بەکارهێنەران‌و چالاکوانان کەمپینێکی گەورەیان دەستپێکردوەو تێیدا داوا لەهەموان دەکەن، ڤیدیۆکەو گۆرانییەکە دابەزێنن‌و دوبارە بڵاوی بکەنەوە، تا پەیامەکەی شێواندنی بەسەردانه‌یه‌ت‌و دەنگی ئەم منداڵە بەزیندویی بمێنێتەوە، چاودێرانیش پێیانوایە، ئەم دۆخە جارێکی دیكه‌ گرژیی وەرزشی‌و کولتوریی نێوان ناسنامەی کوردی‌و دەزگا فەرمییەکانی ئەنكەرەی هێناوەتەوە پێشەوە.