شارپرێس:
ئەلێكساندەر میاسنیكۆڤ پزیشكی روسی دەڵێت: هەموو ئەوەی باسی لێوەدەكریت بەوەی قارچك گەلێك سوودی تەندروستی هەیە و جێگرەوەی گۆشتە هیچ بنەمایەكی نییە، بەڵكو بەپێچەوانەوە بەمەترسیدار و بێسوودی وەسف دەكات.
بەقسەی ئەو پزیشكە خەڵكێكی زۆر بروایان وایە، كە قارچك سەرچاوەیەكی باشی پرۆتینە، كە ئەوەش راست نییە، بەو پێیەی تەنیا ٣٪ی لە پڕۆتین پێكدێت، جگە لەوەش بەهۆی بوونی بڕێكی زۆر لە ماددەی كایتین تێیدا جەستە ناتوانێت بەشێوەیەكی باش بیمژێت.
میاسنیكۆڤ ئاماژەی بۆ ئەوەش كردووە، لە دیارترین خەسڵەتە زیانبەخشەكانی قارچك ئەوەیە دەتوانێت ماددە زیانبەخشەكانی ناو خاك بمژێت.
بەقسەی ئەو پزیشكە روسە هەموو ئەو ڤیتامینانەی لەناو قارچكدا هەیە تەنیا بەگەرمكردن (كوڵاندن یان برژاندن) نامێنن، بەڵام هەموو ماددە زیانبەخشەكانی ناو خاك، لەوانە خوێ كانزاییە قورسەكان دەمێننەوە.
لەبەرانبەردا ئەو پزیشكە ڕێنماییداوە بەوەی فاسۆلیای سەوز بخورێت، ئەویش لەبەر ئەوەی چەوری تەندروست و پرۆتین و دژە ئۆكسێنی تێدایە.
وەرگێڕان: ئاكۆ عەبدوڵڵا ئاڵی