شارپرێس
لەسەر كوژرانی موراد كانی كوردەی و پاسەوانەكانی، لاهور شێخ جەنگی پەیامێكی بڵاوكردەوە و ڕایگەیاند، دانبەخۆداگرتنی
ئێمە لە ڕابردوودا، لە پێناو پاراستنی یەکێتیی و هەیبەتی شەهیدەکان بووە و ئەمە بەو
مانایە نایەت ئەم دانبەخۆداگرتنە تا سەر درێژە پێبدەین و هەروەها، هەر کەسێک تاوانی
کوشتن و تیرۆرکردنی خەڵکی لە ئەستۆ بگرێت لە هەر پلە و پۆستێکی حزبی و حکومیدا بێت،
ئەوا باجەکەی لە ڕووی قانونییەوە زۆر قورس دەبێت و سزاکەی مەرگی ڕاستەقینەی عەدالەت
دەبێت.
لە سەرەتای پەیامەكەی لاهور شێخ
جەنگیدا هاتووە، ئیرادەی خەڵکی کوردستان لە ڕەهەندی سیاسی و ئابوورییەوە لە پێناو ئەجندای
ئیقلیمی ئەوەندە زەلیل کراوە، زۆرینەی ڕەهای خەڵکی کوردستان خۆزگە بۆ سەردەمی دیکتاتۆرەکانی
پێشوو دەخوازن، وابڕیار بوو مانفێستی سۆشیال دیموکراتی و عەدالەتی کۆمەڵایەتی پەیڕەو
بکەین لە کوردستان، کەچی لەبری ئەو مانفێستە بەرنامەی تیرۆر و تیرۆرکردنی خەڵکی کوردستان
بووەتە ئەجندای ئەم(یەکێتییە نوێیەی) کە لەلایەن نەیارە سیاسییەکانمانەوە تەحەکومی
پێوە دەکرێت.
دەشڵێت: ڕۆژانە کادیرە هەرە پێشکەوتوو سەربازی
و سیاسییەکانی خۆی دەستگیر و تیرۆر دەکات، باشە پێم ناڵێن لە کوێی مێژووی حزبایەتیدا
لە سەرتاسەری ئەم جیهانەدا ڕوویداوە کە حزبێکی سۆشیال دیموکرات بە پیلان و پیلانگێڕی،
لە پێناو ئەجندای ئیقلیمی و حزبی تردا، کادیری خۆی تیرۆر بکات کە سێ برای شەهیدی سەربەرزی
یەکێتیی بن؟ وێڕای ئەوەی بنەماڵەکەشی خاوەن دەیان شەهیدن.
لەبارەی بێدەنگییانەوە دەڵێت: دانبەخۆداگرتنی
ئێمە لە ڕابردوودا، فشارهێنانمان بۆ هەڤاڵە سیاسی و سەربازییەکان لەناو یەکێتییدا بۆ
ئەوەی هیچ جۆرە پەرچەکردارێکی سەربازی نەکەن، لە پێناو پاراستنی یەکێتیی و هەیبەتی
شەهیدەکان و قیادەی سیاسی و حزبی یەکێتییەکەماندا بووە، لە پێناو ئەوەدا بووە کە سلێمانی
و ڕانیە، شار و شارۆچکەکانی تری کوردستان نەبن بە مەیدانی تەراتێنی سەربازی و ئەمنی،
بۆ کێش؟ بۆ نەیارەکانی ئەم جوگرافیایە، بەڵام ئەمە بەو مانایە نایەت ئەم دانبەخۆداگرتنە
تا سەر درێژە پێبدەین و قبووڵی بکەین کە ڕۆژانە بە بەرچاومانەوە هەڤاڵانی یەکێتیی وەحشیانە
تیرۆر بکرێن.
لاهور شێخ جەنگی لەو پەیامەیدا وتیشی: ئێمە
تا ئێستاش ئێوەمان بە برا و هەڤاڵی خۆمان زانیوە، بەڵام بەداخەوە دیارە ئێمە هەڵە بووین،
بۆیە دەمەوێت دڵنیابن ئێمە توانای ئەوەمان هەیە دەرگای دۆزەخ بەسەر نەیارەکانماندا
بکەینەوە و لەناو ئاگرەکەیدا هەموو سیناریۆچییەکان و کودەتاچییەکان هەڵپڕوکێنین و بە
تووڕەیی جەماوەری یەکێتیی و جەماوەری کوردستان بە شەرعیەتی کۆنگرە و بە شەرعیەتی جەماوەری
و حەقانیەتی سیاسی ئاگر لەسەر پشتی ئەو خوێنڕێژانە بکەینەوە کە بەرنامە داڕێژەری شەهیدکردنی
هەڤاڵ موراد و هاوڕێکانی بوون.
داوای لە کەسوکار و بنەماڵەی شەهیدەکان كرد، دانبەخۆیاندا
بگرن و هیچ پەرچەکردارێک نەنوێنن تا ئەوکاتەی دڵنیادەبنەوە کە لێکۆڵینەوە ناکرێت و
ئەنجامدەرانی ئەم کارە دەستگیر ناکرێن و یاسا لەم کەیسەدا پشتگوێ دەخرێت.
ئەوەشی وت: هەر کەسێک تاوانی کوشتن و تیرۆرکردنی
خەڵکی لە ئەستۆ بگرێت لە هەر پلە و پۆستێکی حزبی و حکومیدا بێت، بە تایبەت لە تیرۆرکردنەوە
تێوەگلابێت ئەوا باجەکەی لە ڕووی قانونییەوە زۆر قورس دەبێت و سزاکەی مەرگی ڕاستەقینەی
عەدالەت دەبێت.
بەڵێنیشیدا، کە دەستی ئەوانەی بوونە مایەی كوژرانی (موراد کانی کوردەیی) و (خۆشناو وەیسی)
و (هاوکار نازم) و (شامیل زرار) دەخەنە بەر زەبری مقەستی قانون و دادگایەکی عادیلانەوە.
س.س