شارپرێس

لەکاتێکدا دەستەی پارێزگاری سەروەری نیشتمان چوونە بەردەم نوسینگەى پەرلەمانى عێراق لە سلێمانى، بۆئەوەى یاداشتێک ئاراستەى پەرلەمانى عێراق بکەن دژ بە هاتنى سەرۆک کۆمارى تورکیا بۆ عێراق و هێرشەکانى تورکیا بۆسەر هەرێم، بەڵام هێزە ئەمنییەکان ڕێگەیان نەدا یاداشتەکە بدەن بە نوسینگەى پەرلەمان.

وابڕیاربوو، نیوەڕۆى ئەمڕۆ دەستەی پارێزگاری سەروەری نیشتمان بەمەبەستی رەتكردنەوەو بەرەنگار بوونەوەی هەرەشەكانی لەشكركێشی توركیا و سەردانی ئەردۆغان بۆ عێراق و هەرێمی كوردستان، دەنگی نارەزایەتی بگەیەنن بە پەرلەمانى عێراق.

لەگەڵ پێشکەشکردنى یاداشتێکى ناڕەزایەتى بە نوسینگەى سلێمانى پەرلەمانى عێراق بڕیاربوو گردبونەوەیەکیش ئەنجام بدەن و یاداشتەکە بۆ رایگشتى بخوێننەوە.

بەپێى زانیارییەکانى شارپرێس، نیوەڕۆى ئەمڕۆ هێزێکى زۆرى ئەمنى لە دەوروبەرى نوسینگەى سلێمانى پەرلەمانى عێراق بڵاوەى پێکرا و جگە لەوەى ڕێگەیان نەدا گردبونەوە ئەنجام بدرێت، ڕێگەیشیان نەدا نە یاداشت بخوێنرێتەوە و نە یاداشت بدرێت بە پەرلەمانى عێراق.

پێشنیوەڕۆى ئەمڕۆ، رەجەب تەیب ئەردۆغان سەرۆک کۆمارى تورکیا گەیشتە بەغدا و لەلایەن سەرۆک وەزیرانى عێراقەوە پێشوازى لێکرا، وابڕیارە ئێوارەى ئەمڕۆ سەردانى هەولێر بکات.