شارپریس:

میدیاکانی ئیسرائیل بڵاویان کردەوە کە ئێوارەی شەممە شۆشانا کچی ئۆریت سترۆک وەزیری نیشتەجێکردنی ئیسرائیل لە ماڵەکەی خۆیدا لە شارۆچکەی ئەمریمیم لە باکووری ئیسرائیل بە مردوویی دۆزراوەتەوە و لایەنە پەیوەندیدارەکانیش دەستیان بە لێکۆڵینەوە لە بارودۆخ و هۆکاری رووداوەکە کردووە.

بەپێی راپۆرتەکان دەستبەجێ دوای دۆزینەوەی تەرمەکەی تیمەکانی فریاکەوتن بانگ کراون بۆ شوێنەکە و پزیشکان هەوڵێکی زۆریان داوە بۆ بوژاندنەوەی بەڵام لە کۆتاییدا گیانلەدەستدانیان لە شوێنی رووداوەکە راگەیاندووە.

وەزیری ناوبراو کە ئەندامی کابینەی ئەمنییە لە هەژماری خۆی لە سۆشیاڵ میدیا هەواڵەکەی بڵاوکردەوە  و بێزالێل سمۆتریچ وەزیری دارایی ئیسرائیل لە ڕێگەی پلاتفۆرمی ئێکس سەرەخۆشی لە بنەماڵەی سترۆک کردووە و هاوسۆزی خۆی بۆ وەزیر و خێزانەکەی لەم بارودۆخە سەختەدا دەربڕی.

 تا ئێستا دەسەڵاتداران هیچ وردەکارییەکی زیاتریان سەبارەت بە هۆکاری مردنەکە ئاشکرا نەکردووە و لایەنە پەیوەندیدارەکان بەردەوامن لە پشکنینی وردی رووداوەکە.

ئاکۆ عەبدوڵڵا ئاڵی