شارپرێس:
لەنوێترین پێشهاتدا سەبارەت بە دۆسیە نهێنییەکانی پنتاگۆن و ئیدارەی ئەمریکا، بەڵگەنامە ئاشکراکراوەکانی نووسینگەی لێکۆڵینەوەی فیدراڵی (FBI) پەردەیان لەسەر کۆمەڵێک زانیاریی هەستیار لاداوە کە تێیدا هاتووە واشنتن بۆ ماوەی چەندین دەیە نامە و هۆشداریی ترسناکی "بوونەوەرە نامۆکانی" لە جیهان شاردۆتەوە.

 
ئەم بەڵگەنامانە کە بەشێکن لە نوێترین بڵاوکراوەکانی ئیدارەی سەرۆک دۆناڵد ترەمپ تایبەت بە تەنە فڕیوە نەناسراوەکان (UFO)، یاداشتێکی مێژوویی دەزگای (FBI) لە خۆدەگرن کە مێژووەکەی بۆ 12 کانوونی دووەمی 1955 دەگەڕێتەوە. 

بەپێی ڕاپۆرتێکی بەربڵاوی ڕۆژنامەی "دەیلی مەیل"ی بەریتانی، یاداشتەکە پشتی بە شایەتیدانی ئەندامانی "یانەی دیترۆیت بۆ دەفرە فڕیوەکان" بەستووە کە یەکێکە لە کۆنترین ڕێکخراوەکانی چاودێریکردنی گەردوون لە ئەمریکا.

لە دەقی لێکۆڵینەوەکاندا، کەسایەتییەکی دیاری یانەکە بە ناوی ڕانداڵ کۆکس لە ناو ئۆتۆمبێلێکی (FBI)دا بە لێکۆڵەرانی ڕاگەیاندووە کە کۆمەڵەکەیان چەندین نامەی لە دەرەوەی زەوییەوە پێگەیشتووە. 

لە ناوەڕۆکی نامەکاندا هاتووە کە سەرجەم هەسارەکانی گەردوون، جگە لە زەوی، داگیرکراون و بوونەوەرە نامۆکانیش مرۆڤ بە "نزمترین شێوازی بوونی گەردوونی" دەزانن. هەروەها ئاماژە بەوە کراوە کە ئامانجی نامەکان تەنیا ئامادەکردنی مرۆڤایەتییە بۆ پێشوازیکردن لە سەردانە چاوەڕوانکراوەکانی داهاتووی ئەوان بۆ سەر زەوی.

ڕاپۆرتە گەردوونییەکە ئەوەش دەخاتە ڕوو کە کۆکس و هاوڕێکەی، جۆن هۆفمان کە سەربازێکی پێشووی هێزی ئاسمانیی بووە، پلانیان هەبووە سەردانی پێنتاگۆن و دەزگای هەواڵگریی هێزی ئاسمانیی بکەن بۆ ڕادەستکردنی ئەم زانیارییانە. 

هاوکات لێکۆڵەرانی فیدراڵی ئاشکرایان کردووە کە شێوازی ئەم نامانە زۆر هاوشێوەی بانگەشەکانی "دۆرۆسی مارتن"ە؛ ئەو ژنە ناودارەی ساڵی 1954 بە شوێنکەوتووانی گوتبوو لافاوێکی گەورە زەوی لەناو دەبات و تەنیا ئەوان بە دەفرە فڕیوەکان ڕزگار دەکرێن، بەڵام دوای شکستهێنانی پێشبینییەکەی، ڕایگەیاند کە زەوی بەهۆی هێزی باوەڕی ئەوانەوە لەناوچوون ڕزگاری بووە.