شارپرێس ـ ئەحمەد عەبدولحەکیمی:

لەناوجەرگەی ململانێ سیاسییەکانی تاران‌و لەنێو پۆستە باڵاکانی کۆماری ئیسلامیدا، ناوێکی نوێ بەگڕوتینێکی جیاوازەوە سەرهەڵدەدات؛ دکتۆر سارا فەلاحی، ئەو خانمە کوردەی ئیلام کە تەنها نوێنەرێکی ئاسایی پەرلەمان نییە، بەڵکو بوەتە هێمایەک بۆ شکاندنی بەربەستە مێژوییەکان‌و گۆڕینی هاوکێشە سیاسییەکان.

یەکەمین خانم لەمێژوی ئیلامدا؛ شکاندنی تەلسمی پەرلەمان
سارا فەلاحی کچە کوردی شاری (ئەیوان)و هەڵگری بڕوانامەی دکتۆرا لەزانستە سیاسییەکان، توانیی ناوی خۆی لەمێژوی کۆماری ئیسلامیدا تۆماربکات، ئەو یەکەمین ژنە لەمێژوی پارێزگای ئیلامدا کە توانیویەتی متمانەی خەڵک بەدەستبهێنێت‌و کورسییەکی پەرلەمان داگیربکات، نەک تەنها بۆ یەک خول، بەڵکو بۆ دوو خولی لەسەریەک.

فەلاحی پێشئەوەی بچێتە هۆڵی پەرلەمان، لەناوەندە ئەکادیمییەکاندا وەک سەرۆکی ئەنجومەنی ژنانی خوێندەوار، خەریکی پەروەردەکردنی نەوەیەکی نوێ بوە، ئێستاش وەک ئەندامی کۆمسیۆنی ئاسایشی نیشتمانی، لەناوەندی بڕیارە ستراتیژییەکاندایە.

لەبەغداوە بۆ ئیلام؛ دیپلۆماسییەت لەپێناو ڕۆژهەڵاتی کوردستان
لەدواین گەشتی دیپلۆماسیدا بۆ عێراق لەگەڵ وه‌فدى باڵای پەرلەمان به‌سه‌رۆكایه‌تى محەمەد باقر قالیباف، سارا فەلاحی وەک پارێزەرێکی سەرسەختی مافە ئابوریی‌و سیاسییەکانی پارێزگاکەی دەرکەوت.

ئەو لەدیدارەکانیدا لەگەڵ سەرۆک کۆمارو سەرۆک وەزیرانی عێراق، تەنها باسی پەیوەندییە گشتییەکانی نەکرد، بەڵکو داوایەکی مێژویی خستەسەر مێزەكانیان، ئه‌ویش کردنەوەی کونسوڵخانەی عێراق لەپارێزگای ئیلام لەڕۆژهەڵاتی کوردستان.

ئەم هەنگاوە، لەگەڵ پێداگریی لەسەر پڕۆژەی هێڵی شەمەندەفەری (ئیلام ـ مێهران ـ کوت)، نیشانەی تێڕوانینە وردەکەیەتی بۆ بەستنەوەی ڕۆژهەڵاتی کوردستان بەبازاڕە جیهانییەکان‌و ئاسانکاریی بۆ هاتوچۆی هاوڵاتیان کە ئەمەش قورساییەکی سیاسیی‌و ئابوریی گەورە بەناوچەکە دەبەخشێت.

خەونێک بۆ پاستۆر؛ ئایا سارا دەبێتە یەکەم سەرۆک کۆماری ژن؟
گرنگترین‌و پڕ دەنگدانەوه‌ترین لێدوانی سارا فەلاحی، پەیوەستە بەئاییندەی سیاسیی خۆیی‌و وڵاتەکەی، ئەو بەڕاشکاوی ڕایگەیاندوه‌، "ڕەنگە بۆ هەڵبژاردنی داهاتوی سەرۆک کۆماری ئێران خۆم کاندید بکەم".

چاودێران پێیانوایه‌، ئەم لێدوانە تەنها ئارەزویەکی کەسیی نییە، بەڵکو پەیامێکی سیاسییە بۆ ژنانی ئێران کە نابێت خۆیان لەئاستە باڵاکانی بەڕێوەبردنی وڵات بێبەشبکەن، ئەم بوێرییەی فەلاحی لەمیدیاکانی ناوخۆی ئێراندا وەک بومەلەرزەیەکی سیاسیی وەسفکراوه‌، چونکە نەک هەر وەک ژنێک، بەڵکو وەک کوردێکیش دەیەوێت بەرزترین لوتکەی دەسەڵات لەتاران تاقی بکاتەوە.

سارا فەلاحی ئەمڕۆ تەنها دەنگی خەڵکی ئیلام نییە، بەڵکو وەک دیپلۆماتکارێکی لێهاتوو و سیاسییەکی خاوەن دیدگا، خەریکی کێشانی نەخشە ڕێگه‌یەکی نوێیە؛ نەخشەیەک کە تێیدا ژن‌و کوردو زانست، دەبنە سێ کۆڵەکەی سەرەکی بۆ گۆڕانکاریی لەداهاتوی سیاسیی ئێراندا.