شارپرێس:

حاکم قادر رایدەگەیەنێت، ئەو گۆڕانکارییانەی لە ناوچەكەدا ڕودەدەن کاریگەرییەکی گەورەیان لەسەر داهاتووی هەرێم دەبێت، دەشڵێت،" دەبێت بگەڕێینەوە بۆ ناو خەڵک و بەکردەوە خزمەتکاری تاك بە تاکی ھاونیشتیمانیان بین ".

حاکم قادر حەمەجان لەگەڵ ژمارەیەک لە فەرماندە و تێکۆشەری دێرین، سەردانی دەروازەی ڕاپەڕینیان کرد و لە چوارچێوەی ئەم سەردانەدا، ژمارەیەک لە سەركردە و فەرماندە و تێکۆشەری دێرین و کەس و کاری سەربەرزی شەهیدان و هەروەها ژمارەیەک لە کەسایەتییە دیار و ناسراوەکانی ناوچەکەیان بەسەر کردەوە.

بەپێی ڕاگەیەنراوێک،" حاکم قادر لەسەرانەکەیدا ڕۆڵی دەروازەی ڕاپەڕینی بە گشتی لە شۆڕش و ڕاپەڕیندا بەرز نرخاند بە ڕێبەرایەتی یەكێتی، ھەروەھا جەختی لە گرنگی گەڕانەوە بۆ ناو خەڵک و  نزیکبونەوە لێیان كرد و وتی، ئەركی حكومەتە گوێ لەڕەخنە و داواکاری و داخوازی و خزمەتگوزایەكانی خەڵك بگرێت ".

حاکم قادر ئاماژەی بە ڕۆڵ و مێژوی خەڵکی گوندنشینان کرد و جەختیکردەوە،" خەڵکی گوندەکان هەمیشە ڕۆڵێکی گرنگیان لە خزمەتی شۆڕشە یەک لە دوای یەکەکانی گەلەکەماندا هەبوە، ھەر لە قوربانیدان و ماڵ‌وێرانی و ڕوداوەکانی ئەنفال و کیمیابارانەوە، تا خزمەتکردن لە ڕیزەکانی هێزی پێشمەرگەی كوردستان ".

حاکم قادر ھێمایی بۆ ئەوەشكرد،" ئەو گۆڕانکارییانەی لە ناوچەکەدا ڕودەدەن، دەتوانن کاریگەری گەورەیان لەسەر داهاتوی هەرێم هەبێت، بۆیە نابێت بەبێ ئامادەکاری و بەبێ یەکڕیزی و یەکگرتویی بەرەو ئەو قۆناغە بچین ".

حاکم قادر جەختیکردەوە کە لەم بارودۆخە هەستیارەدا،" پێویستە ململانێ و تەخوینی نێوان لایەنەکان وەلابنرێت و هێز و تواناکانمان بۆ پاراستنی خاک و حکومەت و هاونیشتیمان و دابینکردنی ژیانێکی باشتر بۆ خەڵک تەرخان بکەین ".

لە كۆتایی سەردانەكانیاندا حاكم قادر ئاماژەی بە پێویستی پێکهێنانی حکومەتی نوێی هەرێم لە زوترین کاتدا کرد و باسی لەوەشکرد، یەکڕیزی و یەکگرتویی لەم قۆناغەدا تەنها هەڵبژاردە نییە، بەڵکو پێویستییەکی چارەنووسسازە.